പ്രതിഷ്ഠാദിന പൂജകൾക്കായി ഇന്ന് ശബരിമല നട തുറന്നു

സന്നിധാനം: പ്രതിഷ്ഠാ ദിന പൂജകൾക്കായി ശബരിമല നട തുറന്നു. വൈകിട്ട് അഞ്ച് മണിയ്ക്കാണ് നട തുറന്നത്. ഇന്ന് പ്രത്യേക പൂജകൾ ഒന്നുമില്ല. രാത്രി പത്തിന് ഹരിവരാസനം പാടി നടയടയ്ക്കും. നാളെയാണ് പ്രതിഷ്ഠാദിന പൂജകൾ

രാവിലെ അഞ്ച് മണിക്ക് നട തുറക്കും. ഗണപതിഹോമത്തോടെ പൂജകൾ തുടങ്ങും. സഹസ്രകലശം, കളഭാഭിഷേകം, പടിപൂജ, ഉദയാസ്തമനപൂജ, ലക്ഷാര്‍ച്ചന, പുഷ്പാഭിഷേകം എന്നിവ പ്രതിഷ്ഠാദിനത്തിന്റെ ഭാഗമായി നടക്കും. പ്രതിഷ്ഠാ ദിനം പ്രമാണിച്ച് ഒരു ദിവസത്തേക്കാണ് നട തുറന്നത്.

നാളെ പ്രതിഷ്ഠാദിന പൂജകൾ കഴിഞ്ഞ് രാത്രി പത്തിന് ഹരിവരാസനം പാടി നടയടക്കും. കനത്ത സുരക്ഷയിലാണ് സന്നിധാനവും പരിസര പ്രദേശങ്ങളിലും. നിലക്കൽ, പമ്പ, സന്നിധാനം എന്നിവടങ്ങളിൽ ഡിവൈഎസ്പിമാരുടെ നേതൃത്വത്തിലാണ് സുരക്ഷ ഒരുക്കിയിട്ടുള്ളത്. നിലക്കലിൽ വാഹന പരിശോധനയടക്കം സുസജ്ജമായ സംവിധാനങ്ങളുണ്ട്.