‘രാജ്യത്തിന്റെ സ്വാതന്ത്ര്യത്തിനായി സവര്‍ക്കര്‍ ചെയ്ത ത്യാഗങ്ങള്‍ അവഗണിക്കാനാവില്ല’:ശരത് പവാര്‍

ദില്ലി:രാജ്യത്തിന്റെ സ്വാതന്ത്ര്യത്തിനായി വി.ഡി സവര്‍ക്കര്‍ അനുഭവിച്ച ത്യാഗങ്ങള്‍ അവഗണിക്കാനാവില്ലെന്ന് നാഷണലിസ്റ്റ് കോൺഗ്രസ് പാർട്ടി അധ്യക്ഷൻ ശരദ് പവാർ.സവര്‍ക്കറുടെ പേരില്‍ മഹാ വികാസ് അഘാഡി സഖ്യത്തില്‍ വിള്ളല്‍ വീഴുന്നുവെന്ന റിപ്പോര്‍ട്ടുകള്‍ക്കിടെയാണ് പവാറിന്റെ പ്രതികരണം. നാഗ്പൂര്‍ പ്രസ് ക്ലബില്‍ മാദ്ധ്യമപ്രവര്‍ത്തകരോട് സംസാരിക്കുകയായിരുന്നു പവാര്‍.

രാഹുല്‍ ഗാന്ധി വിദേശ മണ്ണില്‍ ഇന്ത്യയെ കുറിച്ച്‌ പറഞ്ഞത് തെറ്റല്ലെന്നും പവാര്‍ കൂട്ടിച്ചേർത്തു. ഇതിനും മുൻപും നേതാക്കള്‍ വിദേശമണ്ണില്‍ ഇന്ത്യയെ കുറിച്ച്‌ സംസാരിച്ചിട്ടുണ്ട്. സവര്‍ക്കറെ കുറിച്ചല്ല ഇപ്പോള്‍ അധികാരത്തിലുള്ളവര്‍ എങ്ങനെയാണ് രാജ്യം നയിക്കുന്നത് എന്നതിനെ സംബന്ധിച്ചാണ് ചര്‍ച്ച വേണ്ടതെന്ന് പവാര്‍ പറഞ്ഞു.

“ഇന്ന് സവർക്കർ ഒരു ദേശീയ വിഷയമല്ല. പഴയ കാര്യമായി മാറിക്കഴിഞ്ഞു. ഞങ്ങൾ സവർക്കറെക്കുറിച്ച് കുറച്ച് കാര്യങ്ങൾ മുൻപ് പറഞ്ഞിട്ടുണ്ട്. പക്ഷേ അത് വ്യക്തിപരമല്ല. അവ ഹിന്ദു മഹാസഭയ്ക്ക് എതിരായിരുന്നു. എന്നാൽ രാജ്യത്തിന്റെ സ്വാതന്ത്ര്യത്തിനായി സവർക്കർ ജി ചെയ്ത ത്യാഗം നമുക്ക് അവഗണിക്കാനാവില്ല,” ശരദ് പവാർ പറഞ്ഞു.