1984-ലെ സിഖ് വിരുദ്ധ കലാപക്കേസിൽ ശിക്ഷിക്കപ്പെട്ട മുൻ കോൺഗ്രസ് എംപി സജ്ജൻ കുമാർ മരിച്ചു, മൂന്ന് തവണ ലോക്‌സഭയിലെത്തിയ സജ്ജൻ കുമാർ തടവറയിലായത് അഞ്ച് സിഖുകാരെ കൊലപ്പെടുത്തിയ കേസിൽ

1984 ലെ സിഖ് വിരുദ്ധ കലാപക്കേസിൽ ജീവപര്യന്തം തടവ് ശിക്ഷ അനുഭവിച്ചു വന്നിരുന്ന മുൻ കോൺഗ്രസ് എം.പി സജ്ജൻ കുമാർ മരിച്ചു . 80 വയസ്സായിരുന്നു. ദില്ലിയിലെ സഫ്ദർജംഗ് ആശുപത്രിയിൽ വെച്ചായിരുന്നു അന്ത്യം. തിഹാർ ജയിലിൽ ജീവപര്യന്തം തടവിൽ കഴിയുകയായിരുന്ന സജ്ജൻ കുമാറിനെ ശാരീരിക അസ്വസ്ഥതകളെ തുടർന്ന് ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു.

1984 ലെ മുൻ പ്രധാനമന്ത്രി ഇന്ദിരാഗാന്ധിയുടെ വധത്തിന് പിന്നാലെ ദില്ലി രാജ്യത്തിന്റെ മറ്റ് ഭാഗങ്ങളിലും ഉണ്ടായ സിഖ് വിരുദ്ധ കലാപത്തിനിടെ അഞ്ച് സിഖുകാരെ കൊലപ്പെടുത്തിയ കേസിലാണ് സജ്ജൻ കുമാർ കുറ്റക്കാരനാണെന്ന് കണ്ടെത്തിയത്. 2018 ഡിസംബറിൽ ദില്ലി ഹൈക്കോടതി സജ്ജൻ കുമാറിനെ ജീവപര്യന്തം തടവിന് ശിക്ഷിച്ചു. വിചാരണക്കോടതി നേരത്തെ വെറുതെവിട്ടിരുന്നെങ്കിലും ഹൈക്കോടതി ഈ വിധി റദ്ദാക്കുകയായിരുന്നു. ഔട്ടർ ദില്ലി മണ്ഡലത്തിൽ നിന്നുള്ള മൂന്ന് തവണ ലോക്‌സഭാംഗമായിരുന്ന സജ്ജൻ കുമാർ കോടതി വിധിയെത്തുടർന്ന് കോൺഗ്രസ് അംഗത്വം രാജിവെച്ചിരുന്നു.

കലാപവുമായി ബന്ധപ്പെട്ട മറ്റ് കേസുകളിലും സജ്ജൻ കുമാറിനെതിരെ കോടതികൾ വിധികൾ പുറപ്പെടുവിച്ചിരുന്നു. 2025 ഫെബ്രുവരിയിൽ സരസ്വതി വിഹാർ കേസിലും റൗസ് അവന്യൂ കോടതി അയാൾക്ക് ജീവപര്യന്തം തടവ് ശിക്ഷ വിധിച്ചിരുന്നു.