സഞ്ജുവിന്റെ അഗ്രസീവ് പ്ലേ അതിഗംഭീരം; അന്താരാഷ്ട്ര മത്സരങ്ങൾക്ക് ആതിഥേയത്വം വഹിക്കാൻ ഏറ്റവും മികച്ച സ്റ്റേഡിയമാണ് കാര്യവട്ടമെന്ന് ഗ്ലെൻ മഗ്രാത്ത്

കാര്യവട്ടം ഗ്രീൻഫീൽഡ് സ്റ്റേഡിയത്തെയും ഇന്ത്യൻ ക്രിക്കറ്റ് താരം സഞ്ജു സാംസണെയും പ്രശംസിച്ച് മുൻ ഓസ്‌ട്രേലിയൻ ക്രിക്കറ്റ് താരം ഗ്ലെൻ മഗ്രാത്ത്. കാര്യവട്ടം ഗ്രീൻഫീൽഡ് സ്റ്റേഡിയം സന്ദർശിച്ചതിനു ശേഷമാണ് താരത്തിന്റെ പ്രതികരണം. അന്താരാഷ്ട്ര മത്സരങ്ങൾക്ക് ആതിഥേയത്വം വഹിക്കാൻ ഏറ്റവും മികച്ച സ്റ്റേഡിയമാണ് കാര്യവട്ടമെന്ന് മഗ്രാത്ത് പറഞ്ഞു.

കൂടാതെ, ഇന്ത്യയുടെ പേസ് സൂപ്പർ താരം ജസ്പ്രീത് ബുമ്രയെയും കേരളത്തിന്റെ അഭിമാനമായ സഞ്ജു സാംസണെയും മഗ്രാത്ത് പ്രശംസിച്ചു. സഞ്ജു മികച്ച താരമാണ്. സഞ്ജുവിന്റെ അഗ്രസീവ് പ്ലേ ഗംഭീരമാണ്. അതേസമയം, ഇന്ത്യൻ ബൗളിംഗിലെ അതുല്യ പ്രതിഭയാണ് ബുമ്ര. അസാധാരണമായ ബൗളിംഗ് ശൈലിയും വേഗതയും താരത്തെ മറ്റുള്ളവരിൽ നിന്ന് വേറിട്ടു നിർത്തുന്നു. താൻ ബുമ്രയുടെ ആരാധകനാണെന്നും മഗ്രാത്ത് പറഞ്ഞു. കൂടാതെ, അടുത്ത ലോകകപ്പിൽ അവസാന നാലിൽ എത്തുന്ന ടീമുകളെക്കുറിച്ചും മഗ്രാത്ത് പ്രവചിച്ചു. ഇന്ത്യ, ഓസ്ട്രേലിയ, ഇംഗ്ലണ്ട്, പാകിസ്ഥാൻ എന്നീ ടീമുകൾ അവസാന നാലിലെത്തുമെന്നും എന്നാൽ ന്യൂസിലൻഡിനെ എഴുതിത്തള്ളാനാകില്ലെന്നും ഗ്ലെൻ മഗ്രാത്ത് പറഞ്ഞു.