സംസ്കൃതം തിരികെ യുവതലമുറയിലേക്ക്; സാമൂഹ മാദ്ധ്യമങ്ങളിലൂടെ ഭാഷയ്ക്ക് നവോന്മേഷം ലഭിച്ചുവെന്ന് പ്രധാനമന്ത്രി നരേന്ദ്രമോദി

ദില്ലി : സാമൂഹ മാദ്ധ്യമങ്ങളും സാംസ്കാരിക ഉള്ളടക്കങ്ങളും വഴി സംസ്കൃത ഭാഷയ്ക്ക് യുവതലമുറക്കിടയിൽ വീണ്ടും പ്രചാരം ലഭിക്കുന്നതായി പ്രധാനമന്ത്രി നരേന്ദ്രമോദി. തൻ്റെ പ്രതിമാസ റേഡിയോ പരിപാടിയായ മൻ കി ബാത്തിന്റെ 127-ാമത് എപ്പിസോഡിൽ സംസാരിക്കുകയായിരുന്നു പ്രധാനമന്ത്രി.

സംസ്കൃതം കേൾക്കുമ്പോൾ നമ്മുടെ മനസ്സിലേക്ക് വരുന്നത് വേദങ്ങൾ, ഉപനിഷത്തുകൾ, പുരാണങ്ങൾ, പ്രാചീന വിജ്ഞാനങ്ങൾ, തത്ത്വചിന്ത എന്നിവയാണെങ്കിലും, ഒരു കാലത്ത് സംസ്കൃതം ആശയവിനിമയത്തിന്റെയും ഗവേഷണങ്ങളുടെയും നാടകാവതരണങ്ങളുടെയും ഭാഷയായിരുന്നുവെന്ന് പ്രധാനമന്ത്രി ഓർമ്മിപ്പിച്ചു.

“ദുഃഖകരമെന്നു പറയട്ടെ, അടിമത്ത കാലഘട്ടത്തിലും അതിനുശേഷവും സംസ്കൃതം സ്ഥിരമായി അവഗണന നേരിട്ടു. തൽഫലമായി, യുവതലമുറയുടെ സംസ്കൃതത്തോടുള്ള താൽപര്യവും കുറഞ്ഞുപോയിരുന്നു,” അദ്ദേഹം പറഞ്ഞു. എന്നാൽ കാലം മാറിക്കൊണ്ടിരിക്കുകയാണെന്നും സംസ്കൃതത്തിനും മാറ്റം വന്നിരിക്കുന്നുവെന്നും പ്രധാനമന്ത്രി സന്തോഷം പ്രകടിപ്പിച്ചു. സാംസ്കാരിക ലോകവും സാമൂഹ മാദ്ധ്യമങ്ങളും സംസ്കൃതത്തിന് ഒരു പുതിയ ഉണർവ് നൽകിയിട്ടുണ്ട്. ഇന്ന് നിരവധി യുവജനങ്ങൾ സംസ്കൃതവുമായി ബന്ധപ്പെട്ട് വളരെ രസകരമായ പ്രവർത്തനങ്ങൾ ചെയ്യുന്നുണ്ടെന്നും അദ്ദേഹം ചൂണ്ടിക്കാട്ടി.

“നിങ്ങൾ സാമൂഹ മാദ്ധ്യമങ്ങളിലേക്ക് പോയാൽ, യുവജനങ്ങൾ സംസ്കൃതത്തിൽ സംസാരിക്കുന്ന നിരവധി റീലുകൾ കാണാൻ സാധിക്കും. പലരും തങ്ങളുടെ സോഷ്യൽ മീഡിയ ചാനലുകളിലൂടെ സംസ്കൃതം പഠിപ്പിക്കുന്നുണ്ട്,” പ്രധാനമന്ത്രി വ്യക്തമാക്കി.

സംസ്കൃത ഭാഷാ പ്രചാരണത്തിനായി പ്രവർത്തിക്കുന്ന യുവ ഉള്ളടക്ക നിർമ്മാതാക്കളെയും അദ്ദേഹം ഉദാഹരണസഹിതം പ്രശംസിച്ചു:

യഷ് സലൂങ്കെ: ക്രിക്കറ്റ് താരവും ഉള്ളടക്ക നിർമ്മാതാവുമായ യഷ്, സംസ്കൃതത്തിൽ സംസാരിച്ചുകൊണ്ട് ക്രിക്കറ്റ് കളിക്കുന്ന റീൽസിലൂടെയാണ് പ്രശസ്തനായത്. കമല, ജാൻഹവി: ഈ സഹോദരിമാർ ആത്മീയത, തത്ത്വചിന്ത, സംഗീതം എന്നിവയെക്കുറിച്ച് ഉള്ളടക്കം നിർമ്മിക്കുന്നു.
‘സംസ്കൃത് ഛാത്രോഹം’: ഈ ഇൻസ്റ്റാഗ്രാം ചാനൽ സംസ്കൃതവുമായി ബന്ധപ്പെട്ട വിവരങ്ങൾ നൽകുന്നതിനൊപ്പം ഹാസ്യ വീഡിയോകളിലൂടെ യുവജനങ്ങളെ ആകർഷിക്കുന്നു. സമഷ്ടി, ഭാവേഷ് ഭീംനാഥാനി: സംസ്കൃത ഗാനങ്ങൾ അവതരിപ്പിക്കുന്ന സമഷ്ടിയെയും ശ്ലോകങ്ങളെക്കുറിച്ചും ആത്മീയ തത്ത്വചിന്തകളെക്കുറിച്ചും സംസാരിക്കുന്ന ഭാവേഷ് ഭീംനാഥാനിയെയും പ്രധാനമന്ത്രി പരാമർശിച്ചു.

“ഏതൊരു നാഗരികതയുടെയും മൂല്യങ്ങളുടെയും പാരമ്പര്യങ്ങളുടെയും വാഹകരാണ് ഭാഷ. സഹസ്രാബ്ദങ്ങളായി സംസ്കൃതം ഈ കടമ നിർവ്വഹിച്ചു,” പ്രധാനമന്ത്രി കൂട്ടിച്ചേർത്തു. സംസ്കൃതത്തോടുള്ള തങ്ങളുടെ കടമ ഇപ്പോൾ യുവജനങ്ങൾ നിറവേറ്റുന്നത് കാണുന്നതിൽ സന്തോഷമുണ്ടെന്നും അദ്ദേഹം പറഞ്ഞു.