രാജ്യ വിരുദ്ധ പ്രവർത്തനങ്ങളിൽ ഏർപ്പെടുന്നുവെന്ന് ആരോപണം; AIBEAയുടെ അംഗീകാരം പുനഃപരിശോധിക്കണമെന്ന് ആവശ്യം; കേന്ദ്ര ധനമന്ത്രിയ്ക്ക് കത്തയച്ച് SBWO

ന്യൂദില്ലി: ഓൾ ഇന്ത്യ ബാങ്ക് എംപ്ലോയീസ് അസോസിയേഷന്റെ (AIBEA) രാഷ്ട്രീയ-ആശയപരമായ പ്രവർത്തനങ്ങളെക്കുറിച്ച് നിഷ്പക്ഷമായ അന്വേഷണം നടത്തണമെന്നും സംഘടനയ്ക്ക് നൽകിയിട്ടുള്ള അംഗീകാരവും ആനുകൂല്യങ്ങളും പുനഃപരിശോധിക്കണമെന്നും ആവശ്യപ്പെട്ട് കേന്ദ്ര ധനമന്ത്രി നിർമ്മലാ സീതാരാമന് പരാതി നൽകി. ഭാരതീയ മസ്ദൂർ സംഘത്തിൽ (BMS) അഫിലിയേറ്റ് ചെയ്തിട്ടുള്ള നാഷണൽ ഓർഗനൈസേഷൻ ഓഫ് ബാങ്ക് വർക്കേഴ്സിന്റെ (NOBW) ഭാഗമായ സ്റ്റേറ്റ് ബാങ്ക് വർക്കേഴ്സ് ഓർഗനൈസേഷൻ (SBWO) ജനറൽ സെക്രട്ടറി രാജേഷ് മുളെയാണ് 2026 ജൂലൈ 20-ന് ഈ കത്തയച്ചത്.

ബാങ്ക് ജീവനക്കാരുടെ ക്ഷേമത്തിനായി പ്രവർത്തിക്കേണ്ട ഒരു ബാങ്കിംഗ് ട്രേഡ് യൂണിയൻ, തങ്ങളുടെ പ്രഖ്യാപിത ലക്ഷ്യങ്ങൾക്ക് നിരക്കാത്ത വിധം രാഷ്ട്രീയ അജണ്ടകളിലും ആശയപരമായ തർക്കങ്ങളിലും ഇടപെടുന്നു എന്നാണ് കത്തിലെ പ്രധാന ആരോപണം.

“1962-ലെ ഇന്ത്യ-ചൈന യുദ്ധം:1962-ലെ യുദ്ധസമയത്ത് ഇന്ത്യയിലേക്ക് അധിനിവേശം നടത്തിയ ചൈനീസ് സേനയെ “സമാധാന ദൂതന്മാർ” അഥവാ “മുക്തി സേന” എന്ന് എ.ഐ.ബി.ഇ.എ വിശേഷിപ്പിച്ചത് വലിയ വിമർശനങ്ങൾക്ക് വഴിവെച്ചിരുന്നു. ദേശീയ താല്പര്യങ്ങൾ സംരക്ഷിക്കുന്നതിനായി 1965-ൽ നാഷണൽ ഓർഗനൈസേഷൻ ഓഫ് ബാങ്ക് വർക്കേഴ്സ് (NOBW) രൂപീകരിക്കുന്നതിലേക്ക് നയിച്ചത് ഈ വിയോജിപ്പുകളാണ്.

പർവേസ് മുഷറഫിന് അനുശോചനം:കാർഗിൽ യുദ്ധത്തിന് കാരണക്കാരനായ മുൻ പാകിസ്ഥാൻ പ്രസിഡന്റ് ജനറൽ പർവേസ് മുഷറഫിന്റെ നിര്യാണത്തിൽ 2024-ൽ നടന്ന അഫിലിയേറ്റഡ് സമ്മേളനത്തിൽ എ.ഐ.ബി.ഇ.എ അനുശോചന പ്രമേയം പാസാക്കിയതായി ചൂണ്ടിക്കാണിക്കുന്നു.

വിദേശ സഹായവും രാഷ്ട്രീയ ബന്ധങ്ങളും: ഗാസയിലെ ഫലസ്തീൻ ദുരിതാശ്വാസത്തിനായി രാജ്യാന്തര ട്രേഡ് യൂണിയൻ വഴി എ.ഐ.ബി.ഇ.എ 5 ലക്ഷം രൂപ സംഭാവന നൽകി. കൂടാതെ, രാഷ്ട്രീയ നേതാവായ കനയ്യ കുമാറിനെ പരിപാടികളിൽ സംസാരിക്കാൻ ക്ഷണിക്കുകയും, കമ്മ്യൂണിസ്റ്റ് പാർട്ടി ഓഫ് ഇന്ത്യ (സി.പി.ഐ) നേതാക്കളുമായി നിരന്തരം ബന്ധം പുലർത്തുകയും ചെയ്യുന്നുണ്ട്.

കർഷക പ്രക്ഷോഭവും മറ്റ് പ്രതിഷേധങ്ങളും: 2020-2021 ലെ കർഷക പ്രക്ഷോഭത്തിന് പിന്തുണ പ്രഖ്യാപിച്ച് ബാങ്ക് ജീവനക്കാരോട് കറുത്ത ബാഡ്ജ് ധരിക്കാൻ എ.ഐ.ബി.ഇ.എ നിർദ്ദേശിച്ചിരുന്നു. ലഡാക്കിലെ പ്രതിഷേധവുമായി ബന്ധപ്പെട്ട് സോനം വാങ്ചുക്കുമായി ചർച്ച നടത്തണമെന്ന് കേന്ദ്ര സർക്കാരിനോട് ആവശ്യപ്പെടുകയും ചെയ്തു.”

എന്നിവയാണ് ഈ കത്തിലെ പ്രധാന ആരോപണങ്ങൾ. ഈ വിഷയങ്ങൾ ബാങ്ക് ജീവനക്കാരുടെ സേവന വ്യവസ്ഥകളുമായോ ക്ഷേമവുമായോ ബന്ധപ്പെട്ടതല്ലെന്നും, ഒരു അംഗീകൃത ട്രേഡ് യൂണിയന്റെ ചുമതലകളിൽ നിന്ന് മാറിയുള്ള പ്രവർത്തനമാണെന്നും കത്തിൽ വ്യക്തമാക്കുന്നു. അതിനാൽ, സംഘടനയുടെ പ്രവർത്തനങ്ങളെക്കുറിച്ച് നിഷ്പക്ഷ അന്വേഷണം നടത്തണമെന്നും, നിയമവിരുദ്ധമായ പ്രവർത്തനങ്ങൾ തെളിയിക്കപ്പെട്ടാൽ എ.ഐ.ബി.ഇ.എ-യ്ക്ക് നൽകിയിട്ടുള്ള അംഗീകാരവും ആനുകൂല്യങ്ങളും റദ്ദാക്കുന്നത് ഉൾപ്പെടെയുള്ള നിയമനടപടികൾ സ്വീകരിക്കണമെന്നും രാജേഷ് മുളെ കത്തിലൂടെ ആവശ്യപ്പെട്ടു. ഈ കത്തിന്റെ പകർപ്പുകൾ പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ എന്നിവർക്കും അയച്ചിട്ടുണ്ട്.