ചന്ദ്രയാൻ -3; വിക്ഷേപണത്തലേന്ന് ചെയർമാനൊപ്പം തിരുപ്പതി ദർശനം നടത്തി ശാസ്ത്രജ്ഞർ

ചന്ദ്രയാൻ -3 വിക്ഷേപണ ദൗത്യത്തിന് മുന്നോടിയായി ഐഎസ്ആർഒ ശാസ്ത്രജ്ഞരുടെ സംഘം തിരുപ്പതി വെങ്കടാചലപതി ക്ഷേത്രത്തിൽ ദർശനം നടത്തി. ദൈവാനുഗ്രഹത്തിനായി അവർ ചന്ദ്രയാൻ -3 ന്റെ ഒരു മിനിയേച്ചർ മോഡൽ പ്രാർത്ഥനയ്ക്കായി കൊണ്ടുവന്നു.

അതേസമയം, വരാനിരിക്കുന്ന ദൗത്യത്തിന്റെ വിജയത്തിനായി ഗ്രാമദേവതയുടെ അനുഗ്രഹവും തേടിയിരിക്കുകയാണ് ഐഎസ്ആർഒ ചെയർമാൻ എസ് സോമനാഥ്. ആന്ധ്രാപ്രദേശിലെ സുല്ലൂർപേട്ടിലെ ശ്രീ ചെങ്കളമ്മ ക്ഷേത്രത്തിൽ അദ്ദേഹം പ്രത്യേക പൂജ നടത്തിയതായാണ് വിവരം. ക്ഷേത്ര സന്ദർശനത്തിന് ശേഷം ചെയർമാൻ എസ് സോമനാഥ് വിക്ഷേപണത്തെ പറ്റിയുള്ള വിശദമായ വിവരങ്ങൾ നൽകിയെന്നാണ് വിവരം.ജൂലൈ 14(നാളെ) ഉച്ചയ്ക്ക് 2.35ന് ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്നാണ് വിക്ഷേപണം.

വിക്ഷേപണത്തിനുശേഷം, ചന്ദ്രയാൻ -3 തുടക്കത്തിൽ ഭൂമിയെ പരിക്രമണം ചെയ്യുകയും അടുത്ത മാസത്തിൽ ക്രമേണ ചന്ദ്രനിലേക്ക് നീങ്ങുകയും ചെയ്യുമെന്നും എല്ലാം പ്ലാൻ അനുസരിച്ച് നടന്നാൽ, ഓഗസ്റ്റ് 23 മുതൽ ബഹിരാകാശ പേടകം ചന്ദ്രനിൽ ഇറങ്ങുമെന്ന് പ്രതീക്ഷിക്കുന്നുവെന്നും മിഷന്റെ വിജയത്തിന് ദൈവത്തിന്റെ അനുഗ്രഹം തേടുന്നതായും അദ്ദേഹം വ്യക്തമാക്കി.