വീണ്ടും കാക്കിയണിഞ്ഞ് സുരേഷ് ഗോപി; “പാപ്പന്‍” സെക്കന്‍ഡ് ലുക്ക് പോസ്റ്റര്‍ വൈറല്‍; ആവേശത്തിൽ ആരാധകർ

കൊച്ചി: നീണ്ട ഇടവേളയ്ക്ക് ശേഷം വീണ്ടും കാക്കിയണിഞ്ഞ് സുരേഷ് ഗോപി. വലിയ ഇടവേളയ്ക്ക് ശേഷം ജോഷി ഒരുക്കുന്ന പാപ്പന്‍ എന്ന (Pappan Movie) ചിത്രത്തിലൂടെയാണ് സുരേഷ് ഗോപി വീണ്ടും പോലീസ് വേഷത്തിലെത്തുന്നത്. രണ്ട് ഗെറ്റപ്പുകളാണ് സുരേഷ് ഗോപിക്ക് ചിത്രത്തിലുള്ളത്. അതിൽ സുരേഷ് ഗോപി പോലീസ് യൂണിഫോമിൽ നിൽക്കുന്ന പാപ്പന്റെ രണ്ടാമത്തെ പോസ്റ്റർ അണിയറ പ്രവർത്തകർ ഇപ്പോൾ പുറത്തുവിട്ടിരിക്കുകയാണ്.

2012ലെ കിംഗ് ആന്‍ഡ് കമ്മീഷണര്‍ എന്ന ചിത്രത്തിലായിരുന്നു സുരേഷ് ഗോപി ഇതിന് മുന്‍പ് പൊലീസ് വേഷത്തിലെത്തിയത്. സുരേഷ് ഗോപിയുടെ 252ാമത്തെ ചിത്രമെന്ന പ്രത്യേകതയും പാപ്പനുണ്ട്. ഇപ്പോഴിതാ പാപ്പനിലെ ഈ ഗെറ്റപ്പ് കണ്ട് അമ്പരന്നിരിക്കുകയാണ് ആരാധകർ. പോലീസ് വേഷങ്ങളിൽ തകർത്തഭിനയിച്ച തങ്ങളുടെ സുരേഷ് ഗോപിയെ തിരികെ ലഭിച്ചുവെന്നാണ് ആരാധകർ പറയുന്നത്. അതേസമയം ജോഷിയും സുരേഷ് ഗോപിയും ഏഴ് വർഷങ്ങൾക്ക് ശേഷം ഒന്നിക്കുന്ന ചിത്രം കൂടിയാണ് പാപ്പൻ.

ക്രൈം ത്രില്ലറായാണ് ചിത്രം ഒരുക്കിയിരിക്കുന്നത്. ലേലം, വാഴുന്നോർ, ക്രിസ്ത്യൻ ബ്രദേഴ്‌സ് ഉൾപ്പെടെ നിരവധി സൂപ്പർ ഹിറ്റുകൾ സുരേഷ് ഗോപി-ജോഷി കൂട്ടുകെട്ടിൽ പിറന്നിട്ടുണ്ട്. നീത പിള്ള, നൈല ഉഷ, ആശ ശരത്, കനിഹ, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ, തുടങ്ങി വമ്പൻ താരനിര പാപ്പനിൽ അണിനിരക്കുന്നുണ്ട്. അതേസമയം ആദ്യമായാണ് സുരേഷ് ​ഗോപിയും ​മകൻ ഗോകുലും ഒരു സിനിമയിൽ ഒന്നിക്കുന്നതെന്ന പ്രത്യേകതയുമുണ്ട്. ചിത്രവുമായി ബന്ധപ്പെട്ട് വരുന്ന അപ്ഡേറ്റുകൾക്ക് വൻ സ്വീകാര്യതയാണ് പ്രേക്ഷകരിൽ നിന്നും ലഭിക്കുന്നത്.