പൊലീസ് ഓഫീസേഴ്സ് അസോസിയേഷൻ നേതാക്കളുടെ കൂട്ടസ്ഥലംമാറ്റത്തിന് തിരിച്ചടി; സർക്കാർ നടപടി ട്രൈബ്യൂണൽ സ്റ്റേ ചെയ്തു

തിരുവനന്തപുരം: പോലീസ് ഓഫീസേഴ്സ് അസോസിയേഷൻ സംസ്ഥാന നേതാക്കൾ ഉൾപ്പെടെയുള്ളവരെ സ്ഥലം മാറ്റിയ സർക്കാർ നടപടി കേരള അഡ്മിനിസ്ട്രേറ്റീവ് ട്രൈബ്യൂണൽ (കെ.എ.റ്റി) താൽക്കാലികമായി സ്റ്റേ ചെയ്തു. അധികാരമേറ്റതിന് പിന്നാലെ പ്രമുഖ അസോസിയേഷൻ ഭാരവാഹികളെ കൂട്ടത്തോടെ ദൂരസ്ഥലങ്ങളിലേക്ക് മാറ്റിയ ആഭ്യന്തര വകുപ്പിന്റെ ഉത്തരവിനാണ് ഇപ്പോൾ തിരിച്ചടിയേറ്റിരിക്കുന്നത്. ഓഫീസേഴ്‌സ് അസോസിയേഷൻ വൈസ് പ്രസിഡൻ്റ് ജ്യോതിഷ് ഉൾപ്പെടെയുള്ള ഉദ്യോഗസ്ഥരുടെ സ്ഥലമാറ്റ ഉത്തരവാണ് ട്രൈബ്യൂണൽ തടഞ്ഞിട്ടുള്ളത്.

ഇടതുപക്ഷ ഭരണാനുകൂല സംഘടനയിലെ പ്രമുഖരായ നേതാക്കളെ ഉൾപ്പെടെയാണ് കഴിഞ്ഞ ദിവസം സർക്കാർ അപ്രതീക്ഷിതമായി സ്ഥലം മാറ്റിയിരുന്നത്. ഇതിൽ തിരുവനന്തപുരം റൂറലിൽ ജോലി ചെയ്തിരുന്നതും വളരെ ദൂരെയുള്ള ജില്ലകളിലേക്ക് മാറ്റപ്പെടുകയും ചെയ്ത നാല് പോലീസ് ഉദ്യോഗസ്ഥരാണ് സർക്കാർ നടപടിക്കെതിരെ കേരള അഡ്മിനിസ്ട്രേറ്റീവ് ട്രൈബ്യൂണലിനെ സമീപിച്ചത്. ഇവരുടെ അടിയന്തര ഹർജി പരിഗണിച്ചുകൊണ്ടാണ് ട്രൈബ്യൂണൽ ഇപ്പോൾ സ്ഥലംമാറ്റത്തിന് മേൽ സ്റ്റേ അനുവദിച്ചിരിക്കുന്നത്.

സ്ഥലംമാറ്റത്തെ പൊതുവായി തങ്ങൾ എതിർക്കുന്നില്ലെന്നും എന്നാൽ കിലോമീറ്ററുകൾ ദൂരെയുള്ള മറ്റ് ജില്ലകളിലേക്ക് മനഃപൂർവം മാറ്റിയ നടപടി ഒഴിവാക്കണമെന്നുമാണ് ഹർജി നൽകിയ പോലീസ് ഉദ്യോഗസ്ഥരുടെ പ്രധാന ആവശ്യം. സംഘടനയിലെ സജീവ പ്രവർത്തകർക്കെതിരെ രാഷ്ട്രീയ വിരോധത്തോടെയുള്ള പ്രതികാര നടപടിയാണ് ഇതെന്ന ആക്ഷേപം ശക്തമാകുന്നതിനിടെയാണ് ട്രൈബ്യൂണലിന്റെ ഈ നിർണായക ഇടപെടൽ ഉണ്ടായിരിക്കുന്നത്. വിഷയത്തിൽ സർക്കാരിന്റെ വിശദീകരണം തേടിയ ശേഷം ട്രൈബ്യൂണൽ തുടർ നടപടികളിലേക്ക് കടക്കും.