സാമന്തയുടെ ശാകുന്തളം നവംബർ നാലിന് തീയറ്ററുകളിൽ ; ചിത്രത്തിന്റെ ഔദ്യോഗിക പോസ്റ്റർ പുറത്ത് വിട്ട് അണിയറപ്രവർത്തകർ

സാമന്ത നായികയായെത്തുന്ന ചിത്രമായ ശാകുന്തളത്തിന്റെ ഔദ്യോഗിക പോസ്റ്റർ അണിയറപ്രവർത്തകർ പുറത്തുവിട്ടു. ഇതോടൊപ്പം ശാകുന്തളത്തിന്റെ റിലീസ് തീയതിയും പുറത്തുവിട്ടു. ഗുണശേഖർ രചനയും സംവിധാനവും നിർവ്വഹിക്കുന്ന ഈ ചിത്രം നവംബർ 4 ന് തിയറ്ററുകളിലെത്തും . സാമന്ത തന്റെ ഔദ്യോഗിക ഇൻസ്റ്റാഗ്രാം ഹാൻഡിലിലൂടെ ശാകുന്തളത്തിന്റെ ആദ്യ മോഷൻ പോസ്റ്റർ പങ്കുവെച്ചു.

സാമന്ത, ദേവ് മോഹൻ എന്നിവരെക്കൂടാതെ അച്ചിൻ ഖേദേക്കർ കബീർ ബേദി, ഡോ.എം.മോഹൻ ബാബു പ്രകാശ് രാജ്, മധുബാല, ഗൗതമി, അദിതി ബാലൻ, അനന്യ നാഗല്ല, ജിഷു സെൻഗുപ്ത എന്നിവരും ശകുന്തളത്തിന്റെ താരനിരയിൽ പ്രധാന വേഷങ്ങളിൽ എത്തുന്നു. ഇവരെ കൂടാതെ അല്ലു അർജുന്റെ മകൾ അല്ലു അർഹയും ഭരത രാജകുമാരനായി അഭിനയിക്കുന്നു.

ഗുണ ടീം വർക്കുമായി സഹകരിച്ച് ശ്രീ വെങ്കിടേശ്വര ക്രിയേഷൻസിന് കീഴിൽ ദിൽ രാജുവാണ് ശാകുന്തളം അവതരിപ്പിച്ചിരിക്കുന്നത്. നീലിമ ഗുണ നിർമ്മിച്ച്, ഗുണശേഖർ രചനയും സംവിധാനവും നിർവ്വഹിച്ച ഈ ചിത്രം 2022 നവംബർ 4 ന് റിലീസിന് ഒരുങ്ങുകയാണ്.

മഹാഭാരതത്തിലെ ശകുന്തളയുടെയും ദുഷ്യന്ത രാജാവിന്റെയും പ്രണയകഥയെ ചുറ്റിപ്പറ്റിയാണ് ശാകുന്തളത്തിന്റെ കഥ. ശകുന്തളയായി സാമന്ത അഭിനയിക്കുമ്പോൾ ദുഷ്യന്ത രാജാവായാണ് ദേവ് മോഹൻ എത്തുന്നത്.