ഷൂട്ടിംഗ് താരം മനു ഭാക്കറിന്റെ ബ്രാൻഡ് മൂല്യം ലക്ഷ്യങ്ങളിൽ നിന്ന് കോടികളിലേക്ക്; മൂന്ന് ദിവസത്തിനുളിൽ സമീപിച്ചത് 40ലധികം പ്രമുഖ പരസ്യ ബ്രാൻഡുകൾ !

ഷൂട്ടിങ്ങിൽ ഇരട്ടമെഡൽ നേട്ടത്തിലൂടെ പാരീസ് ഒളിംപിക്സിൽ ഭാരതത്തിന്റെ അഭിമാനമായി മാറിയ മനു ഭാക്കറിനെ കാത്തിരിക്കുന്നത് വമ്പൻ ഓഫറുകൾ! പത്ത് മീറ്റർ എയർ പിസ്റ്റൽ വ്യക്തിഗത ഇനത്തിലും മിക്സഡ് ടീം ഇനത്തിലും വെങ്കലമെഡൽ നേടിയതോടെ ഇന്ത്യയുടെ ഷൂട്ടിംഗ് സംഘത്തിലെ പ്രധാനികളിലൊരാളായിരുന്ന മനു ഭാക്കറിൻ്റെ ബ്രാൻഡ് മൂല്യം കുത്തനെ ഉയരുന്നു.

കഴിഞ്ഞ മൂന്ന് ദിവസങ്ങൾക്കുള്ളിൽ നാൽപ്പതോളം പ്രമുഖ പരസ്യ ബ്രാൻഡുകളാണ് മനു ഭാക്കറുമായി സഹകരിക്കുവാൻ രംഗത്തെത്തിയിരിക്കുന്നത്. മുൻപ് പരസ്യങ്ങൾക്കായി 20 മുതൽ 25 ലക്ഷം രൂപയുടെ കരാറിൽ ഏർപ്പെട്ടിരുന്ന മനുവിൻ്റെ മൂല്യം ഒറ്റയടിക്ക് അഞ്ചോ ആറോ മടങ്ങ് വർദ്ധിച്ചതായാണ് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നത്. മനു ഭാക്കറിൻ്റെ ഏജൻസി കോടികൾ വിലമതിക്കുന്ന രണ്ട് കരാറുകൾക്ക് സമ്മതം അറിയിച്ചതായും സൂചനയുണ്ട്. എകദേശം ഒന്നരക്കോടിയോളം രൂപ ഒരു പരസ്യത്തിനായി താരം വാങ്ങുന്നുണ്ടെന്നാണ് റിപ്പോർട്ടുകൾ.