ചെരിപ്പിനുള്ളിൽ പാമ്പ് ! സ്പർശന ശേഷി നഷ്‌ടമായ കാലിൽ കടിയേറ്റത് തിരിച്ചറിയാതെ യുവാവ് ചിലവഴിച്ചത് മണിക്കൂറുകൾ ; ഒടുവിൽ ദാരുണാന്ത്യം

ബെംഗളൂരു: ചെരിപ്പിനുള്ളിൽ കയറിയ പാമ്പിന്റെ കടിയേറ്റ് യുവാവിന് ദാരുണാന്ത്യം. ബെംഗളൂരുവിലെ ടിസിഎസ് ജീവനക്കാരനായ മഞ്ജു പ്രകാശാണ് (41) മരിച്ചത്. മുമ്പ് നടന്ന അപകടത്തിൽ മഞ്ജു പ്രകാശിന്റെ കാൽപ്പാദത്തിന് സ്പർശനശേഷി നഷ്ടപ്പെട്ടിരുന്നു. അതിനാൽ തന്നെ പാമ്പിന്റെ കടിയേറ്റ കാര്യം യുവാവിന് തിരിച്ചറിയാൻ കഴിഞ്ഞില്ല. ഇതാണ് മരണത്തിലേക്ക് നയിച്ചതെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നു. ശനിയാഴ്ചയാണ് സംഭവം നടന്നത്.

ബെംഗളൂരു രംഗനാഥ ലേഔട്ടിലെ വീട്ടിലെ മുൻവാതിലിന് മുന്നിൽ വെച്ച ക്രോക്സ് ചെരുപ്പിനുള്ളിലാണ് പാമ്പ് കയറിക്കൂടിയത്. ചെരുപ്പ് ധരിച്ച് അടുത്തുള്ള കടയിൽ പോയി മടങ്ങിയെത്തിയ മഞ്ജു പ്രകാശ് ചെരുപ്പ് ഊരിവെച്ച് മുറിയിലേക്ക് പോയി. ചെരുപ്പ് ധരിച്ച ഉടൻതന്നെ അദ്ദേഹത്തിന് പാമ്പ് കടിയേറ്റിരുന്നു. എന്നാൽ, കാൽപ്പാദത്തിന് സ്പർശനശേഷി നഷ്ടപ്പെട്ടതിനാൽ കടിയേറ്റത് അറിഞ്ഞില്ല.

പ്രകാശ് കടയില്‍പോയി തിരികെ എത്തിയതിന് പിന്നാലെ വീട്ടിലെത്തിയ മറ്റൊരാളാണ് ചെരിപ്പിനുള്ളില്‍ പാമ്പ് കിടക്കുന്നത് കണ്ടത്. ഇയാള്‍ മഞ്ജുപ്രകാശിന്റെ അച്ഛനെ വിളിച്ച് കാര്യംപറഞ്ഞു. തുടര്‍ന്ന് ഇദ്ദേഹം ചെരിപ്പില്‍നിന്ന് പാമ്പിനെ എടുത്തുകളഞ്ഞു. ഈ സമയം പാമ്പ് ചത്തനിലയിലായിരുന്നു. ഇതിനുപിന്നാലെയാണ് മുറിയില്‍ വിശ്രമിക്കുകയായിരുന്ന മഞ്ജുപ്രകാശിനെ തിരക്കി അമ്മയെത്തിയത്. എന്നാല്‍, കാലില്‍നിന്ന് ചോരവാര്‍ന്ന് വായില്‍നിന്ന് നുരയും പതയുംവന്ന നിലയില്‍ കട്ടിലില്‍ കിടക്കുന്നനിലയിലാണ് യുവാവിനെ കണ്ടെത്തിയത്. ഉടന്‍തന്നെ വീട്ടുകാര്‍ യുവാവിനെ സമീപത്തെ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു