മദ്യപിച്ച് വാഹനമോടിച്ച് പിടിയിലാകുന്നവർക്ക് സാമൂഹിക സേവനം നിർബന്ധമാക്കി;ലൈസൻസ് സസപെൻഡ് ചെയ്തവർക്ക് മൂന്ന് ദിവസത്തെ നിർബന്ധിത പരിശീലനം;വാഹനനിയമങ്ങൾ കർശനമാകുന്നു

തിരുവനന്തപുരം:മദ്യപിച്ച് വാഹനമോടിച്ചാൽ ശിക്ഷ സാമൂഹികസേവനം, നിർബന്ധമാക്കി സർക്കാർ.
ഗുരുതരമായ അപകടങ്ങളുണ്ടാക്കുന്ന ഡ്രൈവർമാർ മൂന്ന് ദിവസ നിർബന്ധിത സാമൂഹിക സേവനം ചെയ്യണം. ഗതാഗതമന്ത്രി ആന്റണി രാജുവിന്റെ അദ്ധ്യക്ഷതയിൽ ചേർന്ന ഉന്നതതലയോഗത്തിലാണ് തീരുമാനം എടുത്തത്.

വേഗമേറിയതും അലക്ഷ്യവുമായ യാത്രയ്‌ക്കും, അപകടത്തിൽപ്പെടുത്തുന്നതുമായ ഡ്രൈവിങ്ങിനുമുൾപ്പെടെ നിലവിലുള്ള ശിക്ഷകൾക്ക് പുറമേയാകും സാമൂഹിക സേവനും നിർബന്ധിതമാക്കിയത്. ട്രോമ കെയർ സെന്ററുകളിലും പാലീയേറ്റീവ് കെയർ സെന്ററുകളിലും മൂന്ന് ദിവസം നിർബന്ധിത സാമൂഹിക സേവനം ചെയ്യണം.ഡ്രൈവിങ് ലൈസൻസ് സസ്‌പെൻഡ് ചെയ്യുന്നതിന് പുറമേ എടപ്പാളിലെ ഇൻസ്റ്റിറ്റ്യൂട്ട് ഓഫ് ഡ്രൈവർ ട്രെയിനിങ്ങ് ആന്റ് റിസേർച്ചിൽ മൂന്ന് ദിവസത്തെ പരിശീലനം നിർബന്ധമാക്കും.

നിയമവിരുദ്ധമായി ഹോൺ ഘടിപ്പിക്കുകയും രൂപമാറ്റം വരുത്തുകയും ചെയ്യുന്ന ഇരുചക്ര വാഹനങ്ങൾ ഉൾപ്പെടെയുള്ള എല്ലാ വാഹനങ്ങൾക്കെതിരെയും നടപടി കർശനമാക്കുമെന്ന് സർക്കാർ വ്യക്തമാക്കി. അപകടകരമായി വാഹനമോടിക്കാൻ പ്രോത്സാഹിപ്പിക്കുന്ന വ്‌ളോഗർമാരുടെ പേരിലും നടപടി എടുക്കുമെന്ന് മോട്ടോർ വാഹന വകുപ്പ് അറിയിച്ചു.