രാഷ്ട്രീയ നേട്ടത്തിനായി ചിലർ സീസണൽ ഹിന്ദുവാകുന്നു: കോൺഗ്രസിനെതിരെ ആഞ്ഞടിച്ച് കേന്ദ്രപ്രതിരോധമന്ത്രി രാജ്നാഥ് സിങ്

രാജ്ഗർ : രാഷ്ട്രീയ നേട്ടത്തിന് മാത്രമായി കോൺഗ്രസിലെ ചിലർ സീസണൽ ഹിന്ദുവാകുകയാണെന്ന് തുറന്നടിച്ച് കേന്ദ്രപ്രതിരോധമന്ത്രി രാജ്നാഥ് സിങ്. മധ്യപ്രദേശിൽ ഭരണത്തിലെത്തുന്നതിലൂടെ അഞ്ചുകാര്യങ്ങൾ ഉറപ്പുനൽകുമെന്നാണ് കോൺഗ്രസ് പറയുന്നത്. പ്രതിപക്ഷ പാർട്ടിയുടെ വ്യാജമുഖമാണ് ഇപ്പോൾ വ്യക്തമാകുന്നതെന്നും രാജ്നാഥ് സിങ് ചൂണ്ടിക്കാട്ടി. കിസാൻ കല്യാൺ മഹാകുംഭിൽ ജനക്കൂട്ടത്തെ അഭിസംബോധന ചെയ്ത് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.

‘ചില കോൺഗ്രസ് നേതാക്കൾ സീസണൽ ഹിന്ദുക്കളാണെന്ന് ഞാന്‍ പറയും. എന്തുകൊണ്ടാണ് നർമദയെ അവര്‍ മുൻപ് ഓർക്കാതിരുന്നതെന്ന് ഞാൻ അവരോടു ചോദിക്കുകയാണ്. എന്തുകൊണ്ടാണ് നിങ്ങള്‍ ഇപ്പോൾ നർമദയെ ഓർത്തത്? നര്‍മദ നദിയെ ജീവനാഡിയായി പ്രഖ്യാപിച്ചത് മുഖ്യമന്ത്രി ശിവ്‌രാജ് സിങ് ചൗഹാനാണ്. ഇപ്പോൾ കോൺഗ്രസ് മീറ്റിങ്ങുകളിൽ ഹനുമാൻജിയുടെ പ്രതിമകളൊക്കെ പ്രത്യക്ഷപ്പെടാൻ തുടങ്ങി. മുൻപ് രാമന്റെയും ഹനുമാന്റെയും പേരുകൾ പറയാൻ പോലും അവർക്കു ബുദ്ധിമുട്ടായിരുന്നു. പൊതുജന മധ്യത്തിൽ വ്യാജമുഖവുമായി എത്തുകയാണ് കോൺഗ്രസ് . കമൽനാഥിന്റെ സർക്കാർ ഭരിക്കുമ്പോൾ നിരവധി വാഗ്ദാനങ്ങൾ നൽകിയിരുന്നു. അവയൊന്നും പൂർത്തിയാക്കാതെ ഇപ്പോൽ വീണ്ടും വാഗ്ദാനങ്ങളുമായി എത്തിയിരിക്കുകയാണ്. പ്രധാനമന്ത്രി നരേന്ദ്ര മോദിയും അദ്ദേഹം നേതൃത്വം നൽകുന്ന ബിജെപി സർക്കാരും ഭരിക്കുന്ന സംസ്ഥാനങ്ങളിൽ നൽകിയ എല്ലാ വാഗ്ദാനങ്ങളും നടപ്പാക്കി.

അടുത്തവർഷം ജനുവരിയിൽ അയോധ്യയിലെ രാമക്ഷേത്ര നിർമാണം പൂർത്തിയാകും. ഇപ്പോൾ സൈന്യത്തിലേക്ക് നിരവധി സ്ത്രീകൾ വരുന്നുണ്ട്. സൈനിക സ്കൂളുകളുടെയും എൻഡിഎയുടെയും വാതിലുകൾ നമ്മുടെ പെൺകുട്ടികൾക്കു വേണ്ടി തുറന്നിട്ടിരിക്കുകയാണ്. അടുത്തിടെ സിയാചിനിൽ ഒരു വനിതാ ഓഫിസറെ നിയമിച്ചു. കർഷകർ അന്നദാതാക്കളും ജീവദാതാക്കളുമാണ്. കർഷക ശാക്തീകരണത്തിലൂടെ മാത്രമേ ഇന്ത്യ ശക്തമായ രാജ്യമായി മാറുകയുള്ളൂ . കർഷക ക്ഷേമത്തിനായി പ്രധാനമന്ത്രി നരേന്ദ്ര മോദിയും മധ്യപ്രദേശ് മുഖ്യമന്ത്രി ശിവ്‌രാജ് സിങ് ചൗഹാനും നിരവധി കാര്യങ്ങൾ ചെയ്തിട്ടുണ്ട്. കഴിഞ്ഞ 60 വർഷമായി കർഷക ക്ഷേമത്തിനായി കോൺഗ്രസ് ഒന്നും ചെയ്തിട്ടില്ല.’– രാജ്നാഥ് സിങ് പറഞ്ഞു.