ഋഷഭ് പന്തിനെ കാണാൻ പറന്നെത്തി ശ്രീശാന്ത്, കൂട്ടായി ഹർഭജൻ സിങ്ങും സുരേഷ് റെയ്നയും;ചിത്രങ്ങൾ വൈറൽ

മുംബൈ : വാഹനാപകടത്തിൽ പരിക്കേറ്റ് വിശ്രമിക്കുന്ന ഇന്ത്യൻ വിക്കറ്റ് കീപ്പർ ബാറ്റർ ഋഷഭ് പന്തിനെ കാണാനെത്തി മലയാളിയും മുൻ ഇന്ത്യൻ പേസറുമായ ശ്രീശാന്ത്. ഇന്ത്യൻ ടീമിൽ ഒരുമിച്ച് കളിച്ച ഹർഭജന്‍ സിങ്, സുരേഷ് റെയ്ന എന്നിവർക്കൊപ്പമാണ് ശ്രീശാന്ത് ഋഷഭ് പന്തിനെ കാണാനെത്തിയത്. തൊട്ടുപിന്നാലെ പരിക്ക് മാറി ഋഷഭ് ഫീനിക്സിനെപ്പോലെ കുതിച്ചുയരുമെന്ന് സുരേഷ് റെയ്ന സമൂഹ മാദ്ധ്യമത്തിൽ കുറിച്ചു.

‘‘ഞങ്ങളുടെ സഹോദരന് എല്ലാ ആശംസകളും, അദ്ദേഹത്തിന്റെ പരിക്ക് വേഗത്തില്‍ ഭേദമാകട്ടെ. ഞങ്ങൾ നിന്റെ കൂടെ എപ്പോഴും ഉണ്ടാകും. നീ ഫീനിക്സ് പക്ഷിയെപ്പോലെ ഉയരെ പറക്കട്ടെ.’’– ഋഷഭ് പന്തിനോടൊപ്പമുള്ള ചിത്രം പങ്കുവച്ച് സുരേഷ് റെയ്ന സമൂഹ മാദ്ധ്യമത്തിൽ കുറിച്ചു. കഴിഞ്ഞ വർഷം ഡിസംബറിലുണ്ടായ വാഹനാപകടത്തിൽ പരിക്കേറ്റ പന്തിനു കളിക്കളത്തിലേക്ക് മടങ്ങി വരാൻ ഒരു വർഷത്തോളം സമയം വേണ്ടിവരുമെന്നാണ് കരുതപ്പെടുന്നത്.

പരിക്കിനെത്തുടർന്ന് ഇന്ത്യൻ പ്രീമിയർ ലീഗും ഏഷ്യാ കപ്പ്, ഏകദിന ലോകകപ്പ് മത്സരങ്ങളും പന്തിനു നഷ്ടമാകും.