എസ്എസ്എല്‍സി പരീക്ഷ മാര്‍ച്ച് 31ന്; തയ്യാറെടുപ്പുകള്‍ പൂര്‍ത്തിയായാതായി മുഖ്യമന്ത്രി

തിരുവനന്തപുരം: എസ്.എസ്.എൽ.സി, ഹയർ സെക്കൻഡറി, വൊക്കേഷണൽ ഹയർസെക്കൻഡറി പരീക്ഷകളുടെ തയ്യാറെടുപ്പുകൾ പൂർത്തിയായതായി മുഖ്യമന്ത്രി പിണറായി വിജയൻ അറിയിച്ചു. റെഗുലർ വിഭാഗത്തിൽ മാത്രം 4,26,999 വിദ്യാർത്ഥികൾ ഇത്തവണ എസ്.എസ്.എൽ.സി പരീക്ഷ എഴുതും.

ഇത്തവണ ആകെ 2962 പരീക്ഷാ കേന്ദ്രങ്ങളാണ് സജ്ജമാക്കിയിരിക്കുന്നത്. ഇതിൽ പ്രൈവറ്റ് വിഭാഗത്തിൽ 408 വിദ്യാർത്ഥികൾ അടക്കം മൊത്തം 4,27,407 പേർ പരീക്ഷയിൽ പങ്കെടുക്കും. പ്ലസ് ടു പരീക്ഷ എഴുതുന്നത് 4,32,436 വിദ്യാർത്ഥികളാണ്. ഇവർക്കായി 2005 പരീക്ഷാ കേന്ദ്രങ്ങൾ തയ്യാറാക്കിയിട്ടുണ്ട്. ഗൾഫിൽ എട്ടും, ലക്ഷദ്വീപിൽ ഒൻപതും പരീക്ഷ കേന്ദ്രങ്ങളാണ് ഒരുക്കിയിരിക്കുന്നത്.

അതേസമയം 2022 ജൂണ്‍ ഒന്നിന് തന്നെ സ്‌കൂളുകള്‍ ആരംഭിക്കുന്നതിനുള്ള മുന്നൊരുക്കങ്ങള്‍ നടക്കുന്നതായി വിദ്യാഭ്യാസമന്ത്രി ശിവന്‍കുട്ടി. അക്കാദമിക്ക് മാസ്റ്റർ പ്ലാൻ ഒരുക്കും. കൂടാതെ അധ്യയനം തുടങ്ങുന്നതിന് മുൻപ്, ഡിജിറ്റൽ ഉപകരണങ്ങളുടെ കേടുപാടുകൾ പരിഹരിക്കാൻ ഡിജിറ്റൽ ക്ലിനിക്കുകൾ സംഘടിപ്പിക്കും. ജൂണ്‍ 1 ന് പ്രവേശനോത്സവം സംഘടിപ്പിക്കുമെന്നും മന്ത്രി മാധ്യമങ്ങളോട് പറഞ്ഞു.

1 മുതല്‍ 7 വരെയുള്ള അധ്യാപകരുടെ പരിശീലനം മെയ് മാസത്തില്‍ നടത്താനുള്ള രീതിയിലാണ് പ്രവര്‍ത്തനങ്ങള്‍ മുന്നോട്ടു പോകുന്നത്. എൽ.കെ.ജി, യു.കെ.ജി ക്ലാസുകൾക്ക് അമിത ഫീസ് ഈടാക്കുകയാണെന്ന പരാതിയുടെ വാസ്തവത്തെ സംബന്ധിച്ച് അന്വേഷണം പുരോഗമിക്കുകയാണെന്നും അദ്ദേഹം കൂട്ടിച്ചേർത്തു.