ഇസ്ലാമാബാദിലെ കോടതി സമുച്ചയത്തിന് മുന്നിൽ ചാവേർ ആക്രമണം! 9 പേർ കൊല്ലപ്പെട്ടു ! 21 പേർക്ക് പരിക്ക്!

ഇസ്ലാമാബാദ് : പാകിസ്ഥാൻ തലസ്ഥാനമായ ഇസ്ലാമാബാദിലെ ഒരു പ്രാദേശിക കോടതിക്ക് പുറത്ത് ഉണ്ടായ സ്ഫോടനത്തിൽ 9 പേർ കൊല്ലപ്പെട്ടു. 21 പേർക്ക് പരിക്കേറ്റു. കോടതിക്ക് സമീപം പാർക്ക് ചെയ്തിരുന്ന ഒരു വാഹനത്തിനുള്ളിലെ ഗ്യാസ് സിലിണ്ടർ പൊട്ടിത്തെറിച്ചതാകാം എന്നായിരുന്നു പ്രാഥമിക നിഗമനമെങ്കിലും പരിശോധനയിൽ വാഹനത്തിൽ നിറച്ച സ്ഫോടകവസ്തുക്കൾ പൊട്ടിത്തെറിക്കുകയായിരുന്നുവെന്ന് സ്ഥിരീകരിച്ചു.

അഭിഭാഷകരും കക്ഷികളും, സന്ദർശകരും നിരന്തരം വന്നുപോവുന്ന തിരക്കേറിയ കോടതി സമുച്ചയത്തിന് പുറത്താണ് സ്ഫോടനം നടന്നത്. പരിക്കേറ്റവരെ ഉടൻ തന്നെ സമീപത്തെ ആശുപത്രികളിലേക്ക് മാറ്റുകയും, സുരക്ഷാ സേന പ്രദേശം വളയുകയും ചെയ്തു.

ദില്ലിയിലെ ചെങ്കോട്ടക്ക് സമീപം കഴിഞ്ഞ ദിവസം നടന്ന സ്‌ഫോടനത്തിൽ 13 പേർ മരിച്ച സംഭവത്തിന് തൊട്ടടുത്ത ദിവസമാണ് ഇസ്ലാമാബാദിൽ ഈ സ്ഫോടനം ഉണ്ടായത്. അതിനിടെ അഫ്ഗാൻ അതിർത്തിക്കടുത്തുള്ള ഖൈബർ പഖ്തൂൺഖ്വ പ്രവിശ്യയിലെ വാന നഗരത്തിലുള്ള ഒരു ആർമി-റൺ കോളേജിൽ നടന്ന തീവ്രവാദി ആക്രമണശ്രമം തകർത്തതായി പാക് സൈന്യം അവകാശപ്പെട്ടു. അസോസിയേറ്റഡ് പ്രസ് റിപ്പോർട്ട് ചെയ്തതനുസരിച്ച്, തെഹ്രിക്-ഇ-താലിബാൻ പാകിസ്ഥാനിലെ അഞ്ച് അംഗങ്ങളും ഒരു ചാവേർ കാർ ബോംബറും ചേർന്ന സംഘമാണ് രാത്രിയിൽ കോളേജ് വളപ്പിലേക്ക് അതിക്രമിച്ചു കടക്കാൻ ശ്രമിച്ചത്. വലിയ നാശനഷ്ടങ്ങൾ വരുത്തുന്നതിന് മുൻപ് തന്നെ ആക്രമികളെ വധിച്ചുവെന്ന് സൈന്യം അവകാശപ്പെട്ടു. ദീർഘകാലമായി TTP, അൽ-ഖ്വയ്ദ, മറ്റ് തീവ്രവാദ സംഘടനകൾ എന്നിവയുടെ ശക്തികേന്ദ്രമായി കണക്കാക്കപ്പെടുന്ന പ്രദേശമാണ് വാന.