ടുറിസം, പെട്രോളിയം വകുപ്പുകളിൽ കേരളത്തിന്റെ കയ്യൊപ്പുകളുണ്ടാകുമെന്ന പ്രഖ്യാപനത്തോടെ സുരേഷ്‌ഗോപി കേന്ദ്രമന്ത്രിയായി ചുമതലയേറ്റു; ഇന്ന് കേരളത്തിലേക്ക്; നാളെ മാരാർജി സ്മാരകയും ഇ കെ നായനാരുടെ വീടും സന്ദർശിക്കും

ദില്ലി: കേന്ദ്രമന്ത്രിയായി സുരേഷ്‌ഗോപി ചുമതലയേറ്റു. ക്യാബിനറ്റ് മന്ത്രി ഹർദ്ദീപ് സിംഗ് പുരിയോടൊപ്പമാണ് പെട്രോളിയം മന്ത്രാലയത്തിലെത്തി അദ്ദേഹം ചുമതലയേറ്റത്. തുടർന്ന് ടൂറിസം മന്ത്രാലയത്തിലും അദ്ദേഹം ചുമതലയേറ്റു. കേരളത്തിനായി പെട്രോളിയം ടൂറിസം വകുപ്പുകളിൽ സാധ്യമായതെല്ലാം ചെയ്യും. കാര്യങ്ങൾ കൂടുതൽ പഠിക്കേണ്ടതുണ്ട്. ഭാരതത്തിന്റെ ടൂറിസം മേഖലയിൽ കേരളത്തിന് നിർണ്ണായക പങ്കുവഹിക്കാനുണ്ടെന്ന് പ്രധാനമന്ത്രി തെരഞ്ഞെടുപ്പിന് മുന്നേ പറഞ്ഞിരുന്നു. പ്രധാനമന്ത്രിയുടെയും അമിത്ഷായുടെയും നിർദ്ദേശങ്ങക്കനുസരിച്ച് പ്രവർത്തിക്കുമെന്നും കേരളത്തിന്റെ വികസനത്തിനായി തനിക്ക് ലഭിച്ച സ്ഥാനം ഉപയോഗിക്കുമെന്നും അദ്ദേഹം പറഞ്ഞു.

കേന്ദ്രമന്ത്രിയുടെ തിരക്കുകളിലേക്ക് കടന്നയുടൻ അദ്ദേഹം ഇന്ന് വൈകുന്നേരത്തോടെ കേരളത്തിലെത്തുന്നുണ്ട്. കോഴിക്കോടെത്തി തളി ക്ഷേത്രത്തിൽ ദർശനം നടത്തും. നാളെ കണ്ണൂരിലേക്ക് ട്രെയിൻമാർഗ്ഗം പോകും. പയ്യാമ്പലം ബീച്ചും മാരാർജി സ്മാരകവും സന്ദർശിക്കും. തുടർന്ന് ഇ കെ നായനാരുടെ വീടും സന്ദർശിക്കുമെന്ന് സൂചനയുണ്ട്.