കാർഷിക നിയമങ്ങൾ തച്ചുടച്ച ഇൻഡി മുന്നണിക്കെതിരെ ബാലറ്റിലൂടെ പ്രതികാരം ചെയ്യണമെന്ന് സുരേഷ് ഗോപി ;പാലക്കാട് എടുക്കുക വഴി കേരളം എടുക്കുന്നതിലേക്ക് നീങ്ങുമെന്നും കേന്ദ്രമന്ത്രി

പാലക്കാട്: രാജ്യത്തെ കർഷകർക്ക് ഉപയോഗപ്രദമായിരുന്ന കാർഷിക നിയമങ്ങൾ തച്ചുടച്ച ഇൻഡി മുന്നണിക്കെതിരെ പാലക്കാട് ഉപതെരഞ്ഞെടുപ്പിലൂടെ ജനങ്ങൾ പ്രതികാരം ചെയ്യണമെന്ന് കേന്ദ്രമന്ത്രി സുരേഷ് ഗോപി. കേരളത്തിൻ്റെയും ഭാരതത്തിൻ്റെയും അസ്ഥിത്വം നശിപ്പിക്കുന്നതിന് വേണ്ടി ഇൻഡി മുന്നണി ശ്രമിക്കുകയാണെന്നും അദ്ദേഹം പറഞ്ഞു. പാലക്കാട് മണ്ഡലത്തിലെ എൻഡിഎ സ്ഥാനാർത്ഥി സി. കൃഷ്ണ കുമാറിൻ്റെ പ്രചാരണാർത്ഥം പിരായിരി കൊടുന്തിരപ്പുള്ളിയിലും കൽപാത്തിയിലും നടന്ന യോഗങ്ങളിൽ സംസാരിക്കുകയായിരുന്നു കേന്ദ്രമന്ത്രി

“രാഷ്ട്രീയം എന്നത് അടിമത്വമല്ലെന്ന് തിരിച്ചറിയണം വോട്ട് ചെയ്യേണ്ടത് മണ്ണിന് വേണ്ടിയാകണം. തൃശ്ശൂരിലെ ജനത അത് തിരിച്ചറിഞ്ഞിട്ടുണ്ടെങ്കിൽ പാലക്കാടും വിദൂരമല്ല. കേരളത്തിൻ്റെ ഏറ്റവും വലിയ ശാപം പ്രമേയം പാസാക്കൽ നിയമ സഭയാണ്. പൗരത്വ നിയമം, കാർഷിക നിയമം, വഖഫ് ഭേദഗതി എന്നിവക്കെതിരെ പ്രമേയം പാസാക്കി. കർഷകരുടെ നീതിയുക്തമായ നിലനിൽപ്പിന് വേണ്ടിയാണെങ്കിൽ ബിജെപിക്ക് വോട്ട് ചെയ്യണം. 3 കാർഷിക നിയമങ്ങൾ നശിപ്പിച്ചപ്പോൾ കർഷകരുടെ പ്രശ്നങ്ങൾ പരിഹരിച്ചോ ?

സി. കൃഷ്ണ കുമാറിൻ്റെ ഭരണപരമായ കഴിവും മികവും നാട്ടുകാർക്ക് അറിയാം.പാലക്കാടിൻ്റെ നാമത്തിൽ കേരളത്തിൻ്റെ എംഎൽഎ ആയി കൃഷ്ണകുമാറിനെ അവരോധിക്കണം. പാലക്കാട് എടുക്കുക വഴി കേരളം എടുക്കുന്നതിലേക്ക് നീങ്ങും. ജനങ്ങളെ വഞ്ചിച്ച ഇരു മുന്നണികളെയും തിരിച്ചറിയണം. തനിക്കെതിരെ കോഴിക്കോട് നടന്നത് വലിയ ചതിയായിരുന്നു. ചിലരെങ്കിലും അതിൽ വഴിപ്പെട്ടു. ഇത്തരം നീക്കങ്ങൾ ഉണ്ടാകാനിടയുണ്ട്. തൃശ്ശൂർ പൂരവുമായി ബന്ധപ്പെട്ട് പറഞ്ഞതിൽ ഉറച്ച് നിൽക്കുകയാണ്.”- സുരേഷ്ഗോപി പറഞ്ഞു