ഇനി കുറ്റവാളികൾക്ക് രക്ഷയില്ല: ഉത്തർപ്രദേശിൽ വീണ്ടും ബലാത്സംഗ കേസ് പ്രതികളുടെ വീട് ബുൾഡോസർ ഉപയോഗിച്ച് പൊലീസ് തകർത്തു

ലക്‌നൗ: കുറ്റവാളികൾളെ വീണ്ടും വേട്ടയാടി പിടിക്കാൻ ഉത്തർപ്രദേശ് പൊലീസ്. വീണ്ടും ബലാത്സംഗ കേസ് പ്രതികളുടെ വീട് ബുൾഡോസർ ഉപയോഗിച്ച് തകർത്ത് ഉത്തർപ്രദേശ് പൊലീസ്. ഉത്തര്‍പ്രദേശിലെ സഹാറന്‍പുരിലാണ് സംഭവം.

ബലാത്സംഗ കേസിലെ പ്രതികളായ സഹോദരങ്ങളെ പിടികൂടാനാണ് ഇവരുടെ വീട് പൊലീസ് ബുൾഡോസർ ഉപയോഗിച്ച് തകർത്തത്. ഇതിനു പിന്നാലെ രഹസ്യവിവരത്തിന്റെ അടിസ്ഥാനത്തില്‍ ഒളിവില്‍പോയ പ്രതികളെ പൊലീസ് പിടികൂടി.

പ്രായപൂര്‍ത്തിയാകാത്ത പെണ്‍കുട്ടിയെ ബലാത്സംഗം ചെയ്‌തെന്ന കേസിലാണ് പോലീസ് ബുള്‍ഡോസറുമായി പ്രതികളുടെ വീട് തകർത്തത്. ബലാത്സംഗത്തിനിരയായ പെണ്‍കുട്ടിയുടെ മാതാവ് ആറുദിവസം മുമ്പാണ് പരാതിയുമായി പോലീസിനെ സമീപിച്ചത്. ഇതുപ്രകാരം ഗ്രാമമുഖ്യന്റെ രണ്ട് ആണ്‍മക്കള്‍ ചേര്‍ന്ന് തന്റെ മകളെ ബലാത്സംഗം ചെയ്‌തെന്നും കൊല്ലുമെന്ന് ഭീഷണിപ്പെടുത്തിയെന്നുമായിരുന്നെന്നും ഇവർ പരാതി നൽകി.

വീട്ടിൽ ആരുമില്ലാത്ത സമയത്ത് അതിക്രമിച്ചുകയറിയാണ് പ്രതികൾ പ്രായപൂർത്തിയാകാത്ത പെണ്‍കുട്ടിയെ ബലാത്സംഗം ചെയ്തത്. സംഭവമറിഞ്ഞതോടെ പെണ്‍കുട്ടിയുടെ മാതാവ് പ്രതികളുടെ പിതാവായ ഗ്രാമമുഖ്യനെ കണ്ട് പരാതി അറിയിച്ചു. എന്നാൽ, ഗ്രാമമുഖ്യനും മക്കൾക്ക് അനുകൂലമായ നിലപാട് എടുത്തതോടെയാണ് കേസ് പൊലീസിന് മുന്നിൽ എത്തിയത്.