തോന്നിവാസികൾ മാപ്പ് പറയട്ടെ ! തനിക്കെതിരെ അപകീർത്തിപരമായ പരാമർശം നടത്തിയ ഹസ്കറിന് സ്വപ്നയുടെ വക്കീൽ നോട്ടിസ്

തിരുവനന്തപുരം : ഇടതു പക്ഷത്തിന് കനത്ത തിരിച്ചടി നൽകിക്കൊണ്ട് തനിക്കെതിരെ അപകീർത്തിപരമായ പരാമർശം നടത്തിയ ഇടതുപക്ഷ നിരീക്ഷകനായ അഡ്വ. ബി.എൻ.ഹസ്കറിന് വക്കീൽ നോട്ടിസ് അയച്ചെന്ന് സ്വർണക്കടത്ത് കേസ് പ്രതി സ്വപ്ന സുരേഷ് വെളിപ്പെടുത്തി. ഫെയ്സ്ബുക്കിൽ പങ്കുവച്ച കുറിപ്പിലൂടെയാണ് അവർ ഇക്കാര്യം അറിയിച്ചത്. ഒരാഴ്ചയ്ക്കുള്ളിൽ പരാമർശം പിൻവലിച്ചു നിരുപാധികം മാപ്പ് പറയാത്ത പക്ഷം ഹസ്കറിനെതിരെ കോടതിയിൽ കേസ് കൊടുക്കുമെന്നാണ് സ്വപ്നയുടെ മുന്നറിയിപ്പ്.

സ്വപ്ന സുരേഷ് ഫെയ്സ്ബുക്കിൽ പങ്കുവച്ച കുറിപ്പ് വായിക്കാം

എനിക്കെതിരെ പറയുന്ന അസംബന്ധപരവും അപകീർത്തിപരവുമായ കമന്റുകൾ ഞാൻ സഹിക്കാറില്ല. ഞാൻ നിയമപരമായി അതിനെതിരെ പ്രതികരിക്കുകയും അത് ഒരു യുക്തിസാഹമായി അവസാനിക്കുന്നത് വരെ പോരാടുകയും ചെയ്യും. എനിക്കെതിരെ നിന്ദ്യവും അപകീർത്തിപരവുമായ കമന്റുകൾ പറഞ്ഞ ടിവിയിൽ സിപിഎമ്മിന്റെ പ്രതിനിധിയായി വരുന്ന ബി.എൻ.ഹസ്കറിനെതിരെ ഞാൻ വക്കീൽ നോട്ടിസ് അയച്ചു. ഒരാഴ്ചയ്ക്കുള്ളിൽ കമന്റ് പിൻവലിച്ചു നിരുപാധികം മാപ്പ് പറയാത്ത പക്ഷം ഹസ്കറിനെതിരെ ഞാൻ കോടതിയിൽ കേസ് കൊടുക്കും.

ഗോവിന്ദൻ എന്നോട് ചോദിച്ചത് പോലെ എനിക്ക് ഹസ്കറിന്റെ കാശൊന്നും വേണ്ട. പക്ഷേ, ഹസ്കറിന് ഒരു കാര്യം ഞാൻ ഉറപ്പ് തരാം. ഇത് ഒരു നോട്ടിസിന് വേണ്ടിയുള്ള നോട്ടിസ് അല്ല. ഇത് അവസാനം വരെ ഞാൻ വിടാൻ പോകുന്നില്ല. ഇത്, രാഷ്ട്രീയ പാർട്ടികളിലെ അംഗത്വം എന്ന് വച്ചാൽ ആരെയും അധിക്ഷേപിക്കാനും അപമാനിക്കാനും ഉള്ള ലൈസൻസ് ആണെന്ന് കരുതുന്നവർക്കുള്ള ഒരു മുന്നറിയിപ്പ് മാത്രം.