സ്വര്‍ണ്ണക്കടത്ത് കേസ് പ്രതി സ്വപ്നയ്ക്കെതിരായ ഗൂഢാലോചന കേസ്; ഷാജ് കിരണിന്‍റെ രഹസ്യമൊഴി അന്വേഷണ സംഘം ഇന്ന് രേഖപ്പെടുത്തും

പാലക്കാട്: സ്വര്‍ണ്ണക്കടത്ത് കേസിലെ മുഖ്യപ്രതിയായ സ്വപ്‌ന സുരേഷിനെതിരായ ഗൂഢാലോചനാക്കേസില്‍ അന്വേഷണ സംഘം ഇന്ന് ഷാജ് കിരണിന്‍റെ രഹസ്യമൊഴി രേഖപ്പെടുത്തും. ഉച്ച കഴിഞ്ഞ് മൂന്നുമണിയോടെ പാലക്കാട് ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയിലെത്തി മൊഴി നൽകാനാണ് ഷാജിന് നൽകിയിരിക്കുന്ന നിർദേശം.

ഗൂഢാലോചന കേസില്‍ ഷാജ് കിരണിന്റെ സുഹൃത്ത് ഇബ്രാഹിം നേരത്തെ രഹസ്യമൊഴി നല്‍കിയിരുന്നു. സിപിഎം നേതാവ് സിപി പ്രമോതിന്റെ പരാതിയിലാണ് 164 രേഖപ്പെടുത്തുന്നത്. സ്വപ്ന നേരത്തെ നൽകിയ മൊഴികൾക്ക് വിരുദ്ധമായ പ്രസ്താവനകൾ നടത്തികലാപത്തിന് ശ്രമിക്കുന്നു എന്നാണ് പരാതിയിലെ ആരോപണം. ആദ്യം കസബ പോലീസ് രജിസ്റ്റർ ചെയ്ത കേസ് പിന്നീട് സർക്കാരിനെതിരായ ഗൂഢാലോചന അന്വഷിക്കുന്ന പ്രത്യേക സംഘത്തിന് കൈമാറുകയായിരുന്നു.

അതേസമയം, എച്ച്ആര്‍ഡിഎസ് സ്ഥാപക സെക്രട്ടറി അജി കൃഷ്ണയുടെ ജാമ്യാപേക്ഷ, ഇന്ന് വീണ്ടും പരിഗണിക്കും. മണ്ണാർക്കാട് എസ് സി എസ് ടി കോടതിയാണ് ജന്യപേക്ഷ പരിഗണിക്കുക. ഇന്നലെ ജാമ്യാപേക്ഷ പരിഗണിച്ചിരുന്നുവെങ്കിലും പ്രോസിക്യൂഷൻ വാദം അംഗീകരിച്ച് 24 മണിക്കൂർ പോലീസ് കസ്റ്റഡി അനുവദിക്കുകയായിരുന്നു.

വിദേശത്തായിരുന്ന അജി കൃഷ്മൻ തിരിച്ചെത്തിയതിന് തൊട്ടു പിന്നാലെയായിരുന്നു അറസ്റ്റ്. കെട്ടിച്ചമച്ച കേസ് ആണെന്നും, കേസിൽ ഉൾപ്പെട്ട ഒരാളെ സ്ഥപാനം സംരക്ഷിക്കുന്നതിനാൽ സർക്കാർ പക തീർക്കുക ആണെന്നുമാണ് പ്രതിഭാഗത്തിന്‍റെ വാദം.