ആടിനെ കൊന്ന് രജനികാന്തിന്റെ കട്ടൗട്ടിൽ രക്താഭിഷേകം: ആരാധകരുടെ നടപടിയിൽ മൗനം പാലിച്ച നടനെതിരെ പരാതി

ചെന്നൈ: സൂപ്പർ സ്റ്റാർ രജനികാന്തിന്റെ ‘അണ്ണാത്തെ’ ചിത്രത്തിന്റെ മോഷൻപോസ്റ്റർ റിലീസിനോട് അനുബന്ധിച്ചു ആടിനെ കൊന്ന് രക്തം ഒഴിച്ച ആരാധകരുടെ നടപടിയില്‍ നടനെതിരെ പരാതി. സൂപ്പർസ്റ്റാറിന്റെ കൂറ്റൻ കട്ടൗട്ട് ഉയർത്തി കണ്ണുതട്ടാതിരിക്കാൻ രക്താഭിഷേകവും നടത്തിയാണ് പോസ്റ്റർ റിലീസ് ആഘോഷമാക്കിയത്. എന്നാൽ ആരാധകരുടെ പ്രവർത്തിയിൽ മൗനം പാലിച്ച രജനികാന്തിനെതിരെ കേസെടുക്കണമെന്ന് തമിഴ്‌വേന്ദൻ എന്ന അഭിഭാഷകൻ നൽകിയ പരാതിയിൽ ആവശ്യപ്പെട്ടു.

അതേസമയം ഇതിന് മുൻപ് ‘അണ്ണാത്തെ’യുടെ ഫസ്റ്റ് ലുക്ക് പോസ്റ്റര്‍ പുറത്തിറക്കിയപ്പോഴും ആരാധകര്‍ ആടിനെ കൊന്ന് രജനികാന്തിന്റെ കട്ടൗട്ടില്‍ ഒഴിച്ചുവെന്നും പരാതിയിൽ പറയുന്നുണ്ട്. ക്ഷേത്രങ്ങളിലും ഇറച്ചിക്കടകളിലും മറ്റും ജീവികളെ കൊല്ലുന്നതിന് പ്രത്യേക മറയുണ്ട്. എന്നാൽ ആട്ടിൻകുട്ടിയെ ജനമധ്യത്തിൽവച്ച് അറുത്തശേഷമായിരുന്നു രക്താഭിഷേകം. ഈ ക്രൂരമായ പ്രവൃത്തി സ്ത്രീകളിലും കുട്ടികളിലും ഭയം ജനിപ്പിച്ചു. പ്രാകൃതമായ ഇത്തരം പ്രവൃത്തികള്‍ അനുവദിക്കരുതെന്നും തമിഴ്വേന്ദന്‍ പരാതിയില്‍ പറഞ്ഞു.

ആടിനെ കൊല്ലുന്ന ദൃശ്യങ്ങൾ ആരാധകർ തന്നെ സമൂഹമാധ്യമങ്ങളിൽ പ്രചരിപ്പിച്ചുച്ചിരുന്നു. ഇതോടെ പ്രതിഷേധം ശക്തമാകുകയായിരുന്നു. ആരാധകരെ നിയന്ത്രിക്കാത്ത നടനാണ് പ്രശ്‍നങ്ങൾക്ക് കാരണമെന്നാണ് പരാതിയിലെ ആരോപണം. സംഭവത്തിൽ കർശന നടപടി ആവശ്യപ്പെട്ടു മൃഗസംരക്ഷണ സംഘടനായ പെറ്റയും രംഗത്തെത്തിയിട്ടുണ്ട്.