ആക്രമണം യാത്രാ വിമാനങ്ങളെ മറയാക്കി !പാകിസ്ഥാൻ ചെയ്തത് മാപ്പർഹിക്കാത്ത യുദ്ധ കുറ്റകൃത്യം ; ഉപയോഗിച്ചത് തുർക്കി നിർമ്മിത ഡ്രോണുകൾ

ദില്ലി : കഴിഞ്ഞ ദിവസം വ്യോമാതിർത്തി ലംഘിച്ച് പാകിസ്ഥാൻ ആക്രമണം നടത്തിയതായി സ്ഥിരീകരിച്ച് ഭാരതം. വിദേശകാര്യ മന്ത്രാലയം ഇന്ന് നടത്തിയ വാർത്താ സമ്മേളനത്തിൽ ആക്രമണത്തിന്റെയും അതിന് രാജ്യം നൽകിയ തിരിച്ചടിയുടെയും കൂടുതൽ വിശദാംശങ്ങൾ രാജ്യം പുറത്തു വിട്ടു. ഭട്ടിൻഡ സൈനിക താവളത്തിൽ ഡ്രോൺ ആക്രമണത്തിന് പാകിസ്ഥാൻ ശ്രമിച്ചു. തുർക്കി നിർമ്മിത ഡ്രോണുകളാണ് ആക്രമണത്തിന് ഉപയോഗിച്ചത്. ഇന്ത്യയുടെ നാല് വ്യോമകേന്ദ്രങ്ങളാണു പാകിസ്ഥാൻ ലക്ഷ്യം വെച്ചത്. എന്നാൽ, ഇതെല്ലാം ഇന്ത്യൻ സൈന്യം വിജയകരമായി വിഫലമാക്കി. സിവിലിയൻ വിമാനങ്ങൾ മറയാക്കിയാണ് പാകിസ്താൻ ഡ്രോണുകൾ ഇന്ത്യയിലേക്കു പറത്തിയത്. ആക്രമണം നടക്കുന്ന സമയത്ത് സിവിലയന്‍ വിമാനങ്ങള്‍ക്ക് പാകിസ്ഥാൻ വ്യോമപാത തുറന്നുകൊടുത്തു. ഈ സമയത്ത് ദമ്മാമില്‍ നിന്ന് ലാഹോറിലേക്ക് വിമാനമെത്തി. ഇന്ത്യയുടെ തിരിച്ചടിയില്‍ സിവിലയന്‍ വിമാനങ്ങള്‍ക്ക് അപകടം വരുത്താനും അതിന്റെ ഉത്തരവാദിത്തം ഇന്ത്യയുടെ തലയിൽ അടിച്ചേൽപ്പിക്കാനുമുള്ള ഗൂഡാലോചനയാണ് പാകിസ്ഥാൻ നടത്തിയത്. വിദേശകാര്യ സെക്രട്ടറി വിക്രം മിശ്രി, വിങ് കമാൻഡർ വ്യോമിക സിങ്, കേണൽ സോഫിയ ഖുറേഷിയും എന്നിവർ വാർത്താസമ്മേളനത്തില്‍ പങ്കെടുത്തു.

നിയന്ത്രണ രേഖയിലുടനീളം പാകിസ്ഥാൻ വെടിവെപ്പ് നടത്തി. മോര്‍ട്ടാറുകളും ഹെലി കാലിബര്‍ ആര്‍ട്ടിലറികളുമുപയോഗിച്ച് ആക്രമണം നടത്തി. ഇന്ത്യയിലെ 36 കേന്ദ്രങ്ങളാണ് പാകിസ്താന്‍ ലക്ഷ്യമിട്ടത്. ആക്രമിക്കാന്‍ ഉപയോഗിച്ചത് 500 ഡ്രോണുകളാണ് . അതില്‍ 400 എണ്ണവും ഇന്ത്യ വെടിവെച്ചിട്ടു. ഇന്ത്യയുടെ വ്യോമ പ്രതിരോധ സംവിധാനങ്ങൾ പരിശോധിക്കാനാണ് ഡ്രോണുകൾ അയച്ചതെന്നാണ് സൈന്യത്തിന്റെ വിലയിരുത്തൽ.

ഭാരതത്തിന്റെ പ്രത്യാക്രമണത്തിൽ പാകിസ്ഥാന്റെ ഏരിയല്‍ റഡാര്‍ തകർന്നു. പാക് സൈന്യത്തിന് കനത്ത നാശമുണ്ടാക്കിയെന്നും സൈനിക വക്താക്കള്‍ വ്യക്തമാക്കി