സിനിമാനയ സമിതി രൂപീകരിച്ചു; മുകേഷ് പുറത്ത്!സമിതിയിൽനിന്ന് പിന്മാറിയതാരൊക്കെ?

തിരുവനന്തപുരം: പുതിയ അംഗങ്ങളെ ഉൾപ്പെടുത്തി സിനിമാനയ സമിതി രൂപീകരിച്ചു .എന്നാൽ ലൈം​ഗിക പീഡനാരോപണ കേസിലെ പ്രതിയായ എം.എൽ.എ മുകേഷിനെ സിനിമാനയ രൂപീകരണ സമിതിയിൽ നിന്ന് ഒഴിവാക്കി. പീഡനാരോപണം വന്നതിന് പിന്നാലെ മുകേഷിനെ പുറത്താക്കണമെന്ന ആവശ്യം ഉയർന്നിരിന്നു , ഇതേത്തുടർന്നാണ് ഇപ്പോൾ ഇങ്ങനൊരു നീക്കം സിനിമാനയ രൂപീകരണ സമിതി എടുത്തത്. കേസില്‍ അറസ്റ്റിലായ മുകേഷ് ഇപ്പോൾ ജാമ്യത്തിലാണ്. എന്നാൽ മുകേഷിനെ സംരക്ഷിക്കുന്നത് സർക്കാരാണെന്ന ആരോപണങ്ങളും ഉയരുന്നുണ്ട്.

അതേസമയം ചലച്ചിത്ര വികസന കോർപ്പറേഷൻ ചെയർമാൻ ഷാജി എൻ കരുണിന്റെ അദ്ധ്യക്ഷയിലുള്ള സമിതിയിൽ ചലച്ചിത്ര അക്കാദമി ചെയർമാൻ പ്രേംകുമാർ, സാംസ്കാരിക ക്ഷേമനിധി ബോർഡ് ചെയർമാൻ മധുപാൽ എന്നിവരെ അം​ഗങ്ങളാക്കിയാണ് സമിതി രൂപീകരിച്ചിട്ടുള്ളത്.എന്നാൽ ഫെഫ്കയുടെ പ്രതിനിധിയായിരുന്ന ബി ഉണ്ണികൃഷ്ണൻ സമിതിയിൽ നിന്ന് പിന്മാറിയിട്ടുണ്ടെന്നാണ് വിവരം.സമിതിയുടെ കണ്‍വീനർ സാംസ്കാരിക വകുപ്പിന്റെ മുൻ സെക്രട്ടറി മിനി ആന്റണിയായിരുന്നു. എന്നാൽ, മിനി വിരമിച്ചതിനാല്‍ സമിതിയില്‍ അംഗമായിരുന്ന ചലച്ചിത്ര അക്കാദമി സെക്രട്ടറി സി അജോയ് കണ്‍വീനറാകും. നടിമാരായ നിഖില വിമല്‍, പത്മപ്രിയ, നിർമാതാവ് സന്തോഷ് കുരുവിള എന്നിവരാണ് സമിതിയിലെ മറ്റ് അംഗങ്ങള്‍.