അതീവ സുരക്ഷയിൽ രാജ്യം 71ാം റിപ്പബ്ലിക് ദിനം ആഘോഷിക്കുന്നു; കറുത്ത വസ്ത്രങ്ങൾക്ക് നിയന്ത്രണം

രാജ്യം ഇന്ന് 71ാം റിപ്പബ്ലിക് ദിനം ആഘോഷിക്കുന്നു. രാവിലെ 9 മണിയോടെയാണ് രാജ്പഥിൽ റിപ്പബ്ലിക് ദിന ചടങ്ങുകൾ തുടങ്ങുക. ബ്രസീൽ പ്രസിഡണ്ട് ജൈർ ബോൾസൊനാരോ ആണ് ഇത്തവണ റിപ്പബ്ലിക്ദിന പരേഡിലെ മുഖ്യാതിഥി. രാഷ്ട്രപതി രാംനാഥ് കോവിന്ദ് അഭിവാദ്യം സ്വീകരിക്കുന്ന റിപ്പബ്ലിക് ദിനാഘോഷങ്ങൾക്ക് കടുത്ത നിയന്ത്രണങ്ങളാണ് ഏർപ്പെടുത്തിയിരിക്കുന്നത്.

റിപ്പബ്ലിക് ദിന പരേഡിനിടെയുള്ള പ്രതിഷേധങ്ങൾ തടയാനാണ് നിയന്ത്രണങ്ങൾ ഏർപ്പെടുത്തിയിരിക്കുന്നത്. കറുത്ത ഷാളുകളും തൊപ്പികളും അണിഞ്ഞെത്തുന്നതിനാണ് നിയന്ത്രണങ്ങളെന്നാണ് റിപ്പോർട്ടുകൾ വ്യക്തമാക്കുന്നത്.
റിപ്പബ്ലിക് ദിനാഘോഷം കണക്കിലെടുത്ത് രാജ്യമൊട്ടാകെ കനത്ത സുരക്ഷയേർപ്പെടുത്തിയിട്ടുണ്ട്. ദേശീയ യുദ്ധസ്മാരകത്തിൽ സൈനികര്‍ക്ക് പ്രധാനമന്ത്രി ആദരാഞ്ജലികൾ അര്‍പ്പിക്കുന്നതോടെയാണ് 71-ാം റിപ്പബ്ലിക് ദിനാഘോഷ ചടങ്ങുകൾക്ക് തുടക്കമാവുക. തുടർന്ന് പ്രധാനമന്ത്രി റിപ്പബ്ലിക് ദിന പരേഡിനായി ജൻപഥിലേക്ക് പോകും.

90 മിനിറ്റ് നീളുന്ന പരേഡ് 10 മണിക്കാണ് തുടങ്ങുക. ജനറൽ അസിത് മിസ്ത്രിയാണ് പരേഡ് നയിക്കുക. വായുസേനയുടെ പുതിയ ചിന്നുക്ക് , അപ്പാച്ചെ ഹെലികോപ്റ്ററുകൾ ഒരുക്കുന്ന ആകാശ കാഴ്ചകളും പരേഡിന് മാറ്റ് കൂട്ടും. സാംസ്കാരിക വൈവിധ്യങ്ങൾ ദൃശ്യമാകുന്ന വിവിധ സംസ്ഥാനങ്ങളുടെ ഫ്ളോട്ടുകളും പരേഡിലുണ്ട്. കേരളത്തിന്‍റെ ഫ്ളോട്ടിന് ഇത്തവണ അനുമതി ലഭിച്ചിരുന്നില്ല.

ഇന്ത്യയുടെ റിപ്പബ്ലിക് ദിന പരേഡിൽ പങ്കെടുക്കുന്ന മൂന്നാമത്തെ ബ്രസീൽ പ്രസിഡണ്ടാണ് ബോൾസൊനാരോ. നേരത്തെ 1996, 2004 എന്നീ വർഷങ്ങളിലും ഇന്ത്യയുടെ റിപ്പബ്ലിക് ദിനാഘോഷത്തിൽ മുഖ്യാതിഥിയായി ബ്രസീലിയൻ പ്രസിഡണ്ടുമാർ എത്തിയിരുന്നു.