‘രാജ്യത്തെ സ്‌കൂളുകളിൽ ഇനി ഭഗവത് ഗീത പഠിപ്പിക്കാം’; പ്രാദേശിക ഭാഷ സിലബസിൽ നിർബന്ധമെന്ന് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ

ദില്ലി: പുതിയ വിദ്യാഭ്യാസ നയപ്രകാരം രാജ്യത്തെ സ്‌കൂൾ സിലബസിൽ ഭഗവത് ഗീതയെ ഉൾപ്പെടുത്താൻ സാധിക്കുമെന്ന് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ.

കോൺഗ്രസ് പ്രവർത്തകർ ഗീത വായിക്കുന്നത് നല്ലതാണെന്നും അത് അവരുടെ പ്രവർത്തനങ്ങൾ കൂടുതൽ മികച്ചതാക്കുമെന്നും അദ്ദേഹം പറഞ്ഞു. യുജിസി-നെറ്റ് പരീക്ഷാ സിലബസിലും ഭഗവത് ഗീത ഉൾപ്പെടുത്തിയിട്ടുണ്ടെന്ന് കേന്ദ്ര മന്ത്രി ധർമ്മേന്ദ്ര പ്രധാൻ വ്യക്തമാക്കി.

മാത്രമല്ല ഓൾ ഇന്ത്യ കൗൺസിൽ ഫോർ ടെക്നിക്കൽ എജ്യുക്കേഷൻ, 2018-ൽ യുജി, എഞ്ചിനീയറിംഗ് കോഴ്സുകളുടെ മാതൃകാ പാഠ്യപദ്ധതിയിൽ ഇന്ത്യൻ പരമ്പരാഗത വിജ്ഞാന സമ്പ്രദായത്തിന്റെ ഒരു കോഴ്സ് അവതരിപ്പിച്ചിട്ടുണ്ടെന്നും ഇതിൽ ശ്രീമദ് ഭഗവത് ഗീതയിലെ ചില ആശയങ്ങൾ ഉൾക്കൊള്ളിച്ചിട്ടുണ്ടെന്നും അദ്ദേഹം പറഞ്ഞു.

അതേസമയം ‘വിദ്യാർത്ഥികൾക്ക് ഭഗവത് ഗീത പഠിപ്പിക്കണോ വേണ്ടയോ എന്ന് സംസ്ഥാന സർക്കാരുകൾക്ക് തീരുമാനിക്കാം. സ്‌കൂളുകളിൽ ഭോജ്പൂരി ഭാഷ പഠിപ്പിക്കാനും സർക്കാരുകൾക്ക് അനുമതിയുണ്ടെന്ന് കേന്ദ്ര വിദ്യാഭ്യാസ സഹമന്ത്രി അന്നപൂർണ ദേവിയും ലോക്‌സഭയിൽ അറിയിച്ചു.

പുതിയ വിദ്യാഭ്യാസ നയപ്രകാരം കുട്ടികളുടെ സിലബസിൽ പ്രാദേശിക ഭാഷ നിർബന്ധമാക്കിയിരിക്കുകയാണ്. ഇതോടൊപ്പം സംസ്ഥാന സർക്കാരുകൾക്ക് ഭഗവത് ഗീത ഉൾപ്പെടുത്താം. നിലവിൽ സിബിഎസ്ഇ സിലബസിൽ ഭഗവത് ഗീത ഉൾപ്പെടുത്തിയിട്ടുണ്ട്.- അന്നപൂർണ ദേവി പറഞ്ഞു

രാജ്യത്തെ എല്ലാ സംസ്ഥാനങ്ങളിലും ഭഗവത് ഗീത പഠിപ്പിക്കുന്ന പദ്ധതി നടപ്പിലാക്കാൻ സാധിക്കൂമോ എന്ന മുംബൈയിലെ ബിജെപി എംപിയുടെ ചോദ്യത്തിന് മറുപടിയായണ് അന്നപൂർണ ദേവി ഇക്കാര്യം അറിയിച്ചത്.