അന്യസംസ്ഥാന തൊഴിലാളികളായ മാതാപിതാക്കൾ ഐസിയുവിൽ ഉപേക്ഷിച്ച് കടന്ന കുഞ്ഞിനെ സർക്കാർ ഏറ്റെടുക്കും; “നിധി”യെ നാളെ ശിശുക്ഷേമ സമിതിക്ക് കൈമാറും

തിരുവനന്തപുരം: അന്യസംസ്ഥാന തൊഴിലാളികളായ മാതാപിതാക്കൾ സ്വകാര്യ ആശുപത്രി ഐസിയുവിൽ ഉപേക്ഷിച്ച് പോയ മൂന്നാഴ്ച മാത്രം പ്രായമായ പെൺകുഞ്ഞിനെ സർക്കാർ ഏറ്റെടുക്കും. നാളെ കുഞ്ഞിനെ ശിശുക്ഷേമ സമിതിക്ക് കൈമാറും. കുഞ്ഞിന് ‘നിധി’ എന്ന് പേരിട്ടു. ആശുപത്രി സൂപ്രണ്ടിന്റെ അഭ്യർഥന പ്രകാരം ആരോഗ്യമന്ത്രി വീണാ ജോർജാണ് കുഞ്ഞിന് പേരിട്ടത്.

കോട്ടയത്തെ ഫിഷ് ഫാമിൽ ജോലി ചെയ്തിരുന്ന അന്യസംസ്ഥാന തൊഴിലാളികളായ ദമ്പതികൾ, പ്രസവത്തിനായി നാട്ടിലേക്ക് പോകുന്ന സമയത്താണ് ട്രെയിനിൽ വച്ച് ഭാര്യയ്ക്ക് അസ്വസ്ഥതകളുണ്ടായത്. തുടർന്ന് തൊട്ടടുത്തുള്ള ആശുപത്രിയിലെത്തിക്കുകയും പെൺകുഞ്ഞിന് ജന്മം നൽകുകയും ചെയ്തു. തുടർന്ന്, കുഞ്ഞിന് ഒരുകിലോയിൽ താഴെ മാത്രമോ ഭാരമുണ്ടായിരുന്നുള്ളൂ എന്നതിനാൽ കുഞ്ഞിനെ അവർ സ്വകാര്യ ആശുപത്രിയിലേക്ക് മാറ്റിയതിന് ശേഷം കടന്നുകളയുകയായിരുന്നു. സംഭവം വാർത്തയായതോടെ ആരോ​ഗ്യമന്ത്രി കുഞ്ഞിന്റെ സംരക്ഷണവും ചികിത്സയും ഏറ്റെടുക്കാൻ നിർദേശം നൽകുകയും കുഞ്ഞിന് എറണാകുളം ജനറൽ ആശുപത്രിയിൽ എത്തിച്ച് വിദഗ്ധ പരിചരണം ഉറപ്പാക്കുകയും ചെയ്തു. കുഞ്ഞിന്റെ ചികിത്സയ്ക്ക് സ്വകാര്യ ആശുപത്രിയിൽ ചെലവായ തുക ആരോഗ്യ വകുപ്പ് ഡയറക്ടർ നിശ്ചയിക്കുന്ന പ്രകാരം വനിത ശിശുവികസന വകുപ്പിന്റെ ബാലനിധിയിലൂടെ അനുവദിക്കാനും തീരുമാനിച്ചു.

ആശുപത്രിയിൽ എത്തിയപ്പോൾ 950 ഗ്രാം മാത്രമായിരുന്നു കുഞ്ഞിന്റെ തൂക്കം. ഒരാഴ്ചയോളം കുഞ്ഞിന് ഓക്‌സിജൻ നൽകിയിരുന്നു. അനീമിയ ഉണ്ടായിരുന്നതിനാൽ രണ്ട് പ്രാവശ്യം രക്തം നൽകി. ആശുപത്രിയിലെ മിൽക്ക് ബാങ്കിൽ നിന്നും കുഞ്ഞിനാവശ്യമായ മുലപ്പാൽ നൽകുന്നുണ്ട്. പൂർണ ആരോഗ്യവതിയായ കുഞ്ഞിനിപ്പോൾ 37 ആഴ്ച പ്രായവും രണ്ടര കിലോ തൂക്കവുമണ്ട്. സാധാരണ കുട്ടികളെ പോലെ പാൽ കുടിക്കാൻ കഴിയുന്ന അവസ്ഥയിലാണ് കുഞ്ഞിനെ ശിശുക്ഷേമ സമിതിയ്ക്ക് കൈമാറുന്നത്.