കൂടല്ലൂരിൽ യുവാവിനെ കൊന്നുതിന്ന നരഭോജി കടുവയെ ആവശ്യമെങ്കിൽ വെടിവെച്ച് കൊല്ലാമെന്ന ഉത്തരവിനെതിനെതിരെ സമർപ്പിച്ച ഹർജി തള്ളി ഹൈക്കോടതി ! ഹർജിക്കാരന് 25000 രൂപ പിഴയും !

വാകേരി കൂടല്ലൂരില്‍ യുവാവിനെ കൊന്നുതിന്ന നരഭോജി കടുവയെ ആവശ്യമെങ്കില്‍ വെടിവെച്ചു കൊല്ലാമെന്ന സംസ്ഥാന ചീഫ് വൈല്‍ഡ് ലൈഫ് വാര്‍ഡന്റെ ഉത്തരവിനെതിരേ ആനിമല്‍ ആന്‍ഡ് നേച്ചര്‍ എത്തിക്‌സ് കമ്യൂണിറ്റി നല്‍കിയ ഹര്‍ജി ഹൈക്കോടതി തള്ളി. ഹര്‍ജിക്കാരന് 25,000 രൂപ പിഴയും വിധിച്ചു.

സംസ്ഥാന ചീഫ് വൈല്‍ഡ് ലൈഫ് വാര്‍ഡന്റെ ഉത്തരവ് നടപടിക്രമങ്ങള്‍ പാലിക്കാതെയാണെന്ന് ചൂണ്ടിക്കാണിച്ചാണ് ഇതിനെതിരേ ഹൈക്കോടതിയില്‍ ഹര്‍ജി ഫയല്‍ ചെയ്തത്. എന്നാല്‍ നരഭോജിയായ കടുവയെ വെടിവെക്കുന്നതിന് നിയമപരമായ എല്ലാ വശങ്ങളും പരിശോധിച്ച ശേഷമാണ് ഉത്തരവിറക്കിയിരിക്കുന്നതെന്നും ഇത്തരത്തിലുള്ള ഹര്‍ജികള്‍ സമര്‍പ്പിച്ച് പബ്ലിസിറ്റിക്ക് ശ്രമിക്കരുതെന്നും ഹൈക്കോടതി രൂക്ഷമായി വിമർശിച്ചു. മാത്രമല്ല ഹര്‍ജിക്കാരന്‍ 25000 രൂപ പിഴ അടക്കാനും ഹൈക്കോടതി ഉത്തരവിട്ടു.

ഇക്കഴിഞ്ഞ ശനിയാഴ്ചയാണ് ഭാഗികമായി കടുവ ഭക്ഷിച്ച നിലയിൽ പ്രജീഷിന്റെ മൃതദേഹം കണ്ടെത്തിയത്. ഉച്ചയോടെ പശുവിന് പുല്ലുവെട്ടാന്‍ പോയതായിരുന്നു ഇയാൾ. വൈകിയിട്ടും തിരിച്ചെത്താതിനെത്തുടര്‍ന്ന് സഹോദരന്‍ അന്വേഷിച്ച് പോയപ്പോഴാണ് വയലില്‍ പാതി ഭക്ഷിച്ച നിലയില്‍ പ്രജീഷിന്റെ മൃതദേഹം കണ്ടെത്തിയത്. മൃതദേഹം കണ്ടെത്തിയ സ്ഥലത്തുനിന്നും അര കിലോമീറ്ററിനുള്ളിൽ വനപ്രദേശമാണ്. നേരത്തെയും കടുവ ശല്യമുണ്ടായ പ്രദേശമാണിത്. മുമ്പ് പ്രദേശത്തെ കന്നുകാലികളെ കടുവ ആക്രമിച്ചിരുന്നു. മധ്യപ്രദേശ് സര്‍ക്കാരിന്റെ കീഴിലുള്ള ബീനാച്ചി എസ്റ്റേറ്റ് കടുവയുടെ താവളമാണെന്ന് നേരത്തെ തന്നെ പരാതി ഉയര്‍ന്നിരുന്നു. 600 ഏക്കറോളം വിസ്തീര്‍ണ്ണമുള്ള എസ്‌റ്റേറ്റ് ആണിത്.
കടുവയെ മയക്കുവെടിവെച്ച് പിടികൂടിയാല്‍ പോരെന്നും വെടിവെച്ചുകൊല്ലണമെന്ന് ആശ്യപ്പെട്ട് പ്രജീഷിന്റെ മൃതദേഹം നീക്കംചെയ്യാന്‍ അനുവദിക്കാതെ നാട്ടുകാര്‍ മണിക്കൂറുകളോളം പ്രതിഷേധിച്ചിരുന്നു. പിന്നാലെയാണ് വെടിവെച്ച് കൊല്ലാനുള്ള ഉത്തരവിറക്കിയത്.