നാലു വർഷങ്ങൾക്ക് ശേഷം നാട്ടിലേക്കു മടങ്ങിയ ഇന്ത്യൻ യുവതി വിമാനത്തിനുള്ളിൽ മരിച്ചു! പഞ്ചാബ് സ്വദേശിനിയുടെ മരണം ക്ഷയരോഗം മൂർച്ഛിച്ചതിനെത്തുടർന്നെന്ന് പ്രാഥമിക നിഗമനം

ദില്ലി : നാലു വർഷങ്ങൾക്ക് ശേഷം ഓസ്‌ട്രേലിയയിൽ നിന്ന് നാട്ടിലേക്കു മടങ്ങാൻ വിമാനത്തിൽ കയറിയ ഇന്ത്യൻ വംശജയായ യുവതി വിമാനത്തിനുള്ളിൽ വച്ച് മരിച്ചു. ജൂൺ 20ന് ഓസ്‌ട്രേലിയയിലെ ടുല്ലാമറൈൻ വിമാനത്താവളത്തിൽ നിന്ന് ദില്ലി വഴി പഞ്ചാബിലേക്കുള്ള ക്വാന്റസ് വിമാനത്തിൽ യാത്ര ചെയ്യുകയായിരുന്ന മൻപ്രീത് കൗർ (24) ആണ് മരിച്ചത്. സീറ്റിലിരുന്ന് ബെൽറ്റ് ഇടുന്നതിനിടെയാണ് ഇവർ മരിച്ചതെന്ന് ഓസ്ട്രേലിയൻ മാദ്ധ്യമങ്ങൾ റിപ്പോർട്ട് ചെയ്തു. ക്ഷയരോഗ ബാധിതയായിരുന്ന അവർ രോഗം മൂർച്ഛിച്ചാണ് മരിച്ചതെന്നാണു വിവരം

വിമാനത്താവളത്തിൽ എത്തുന്നതിനു മുൻപുതന്നെ മൻപ്രീതിന് അസ്വസ്ഥതയുണ്ടായിരുന്നതായി സുഹൃത്തുക്കളെ ഉദ്ധരിച്ച് മാധ്യമങ്ങൾ റിപ്പോർട്ട് ചെയ്തു. തുടർന്ന് സീറ്റ് ബെൽറ്റിടാൻ ശ്രമിക്കവേ കുഴഞ്ഞുവീഴുകയായിരുന്നു. ഉടൻ തന്നെ മരണം സംഭവിച്ചു. ഷെഫ് ആകാൻ പഠിക്കുകയായിരുന്ന മൻപ്രീത് ഓസ്ട്രേലിയ പോസ്റ്റിനുവേണ്ടി ജോലി ചെയ്യുകയായിരുന്നു. 2020 മാർ‍ച്ചിലാണ് ഇവർ ഓസ്ട്രേലിയയിലേക്ക് എത്തിയത്.