തിരുമ്പി വന്തിട്ടേന്ന് സൊല്ല് !!! കുത്തനെ കുതിച്ച് രാജ്യത്തെ സൂചികകള്‍ ; നിക്ഷേപകർക്ക് നേട്ടം 6 ലക്ഷം കോടി

നഷ്ടത്തിന്റെ കണക്കുകൾ മറന്ന് കുത്തനെ കുതിച്ച് രാജ്യത്തെ സൂചികകള്‍. ധനകാര്യം, ഓട്ടോ, ഐടി ഓഹരികളിലെ മികച്ച പ്രതികരണമാണ് സൂചികകളുടെ നേട്ടത്തിന് നട്ടെല്ലായത്. 1400 പോയന്റാണ് ഇന്ന് ഒറ്റ ദിവസം സെന്‍സെക്‌സിൽ ഉയർന്നത്. നിഫ്റ്റിയാകട്ടെ 450 പോയന്റിലേറെ മുന്നേറി 24,200 തിരികെ പിടിച്ചു. വിപണിയിലെ മുന്നേറ്റത്തില്‍ ബിഎസ്ഇയില്‍ ലിസ്റ്റ് ചെയ്ത കമ്പനികളുടെ മൊത്തം മൂല്യം 5.58 ലക്ഷം കോടി രൂപ ഉയര്‍ന്ന് 450.01 ലക്ഷം കോടിയിലെത്തി. സെക്ടറല്‍ സൂചികകളില്‍ നിഫ്റ്റി ഓട്ടോ, ഐടി എന്നിവയാണ് മുന്നില്‍. ഓട്ടോ 3.5 ശതമാനവും ഐടി 2 ശതമാനവും നേട്ടമുണ്ടാക്കി.

ഓട്ടോ ഓഹരികളുടെ മുന്നേറ്റത്തിന് പിന്നില്‍ കഴിഞ്ഞ മാസത്തെ വാഹന വിൽപ്പന കണക്കുകളാണ്. ഐഷര്‍ മോട്ടോഴ്‌സ് ആണ് കുതിപ്പിന് നേതൃത്വം നല്‍കിയത്. റോയല്‍ എന്‍ഫീല്‍ഡിന്റെ വില്പനയില്‍ 25 ശതമാനം വര്‍ധനവുണ്ടായെന്ന റിപ്പോര്‍ട്ടുകളെ തുടര്‍ന്ന് ഓഹരി വിലയില്‍ ഏഴ് ശതമാനം മുന്നേറ്റമുണ്ടായി. വാര്‍ഷിക വില്പനയില്‍ 30 ശതമാനം വര്‍ധന രേഖപ്പെടുത്തിയതിന് പിന്നാലെ മാരുതിയുടെ ഓഹരി വില 4.5 ശതമാനം ഉയര്‍ന്നു. മഹീന്ദ്ര ആന്‍ഡ് മഹീന്ദ്ര, അശോക് ലൈലാന്‍ഡ് എന്നിവ നാല് ശതമാനം നേട്ടമുണ്ടാക്കി.

ഐടി മേഖലകളിൽ ഇന്‍ഫോസിസ്, ടിസിഎസ്, എച്ച്‌സിഎല്‍ ടെക്, ടെക് മഹീന്ദ്ര ഉള്‍പ്പടെയുള്ള കമ്പനികളുടെ ഓഹരി വിലയില്‍ മുന്നേറ്റമുണ്ടായി.

ബജാജ് ഫിന്‍സര്‍വ്, ബജാജ് ഫിനാന്‍സ് എന്നീ ഓഹരികളുടെ നേതൃത്വത്തില്‍ ബാങ്കിങ്-ധനകാര്യ ഓഹരികള്‍ മികച്ച നേട്ടമുണ്ടാക്കി. വാര്‍ഷികാടിസ്ഥാനത്തില്‍ ജിഎസ്ടി വരുമാനം 7.3 ശതമാനം ഉയര്‍ന്ന് 1.77 ലക്ഷം കോടി രൂപയിലെത്തിയത് വിപണി നേട്ടമാക്കി. ഉപഭോഗം കൂടുന്നതിന്റെ സൂചനയാണ് വിപണിയെ തുണച്ചത്.