‘കശ്മീർ ഫയൽസ്‘ വ്യാജ പതിപ്പ് ഡൗൺലോഡ് ചെയ്യാൻ ശ്രമിച്ചു: കിട്ടിയത് എട്ടിന്റെ പണി; 30 ലക്ഷം വരെ നഷ്ടമായിട്ടും പരാതി നൽകാനാവാത്ത അവസ്ഥയിൽ

ദില്ലി: കശ്മീർ വംശഹത്യയുടെ യഥാർത്ഥ ചരിത്രം വരച്ചു കാട്ടുന്ന ദി കശ്മീർ ഫയൽസ് എന്ന സിനിമ സൂപ്പർ ഹിറ്റായി പ്രദർശനം തുടരുകയാണ്. ഇപ്പോഴിതാ കശ്മീർ ഫയൽസിന്റെ വ്യാജ പതിപ്പ് ഡൗൺലോഡ് ചെയ്യാൻ ടെലിഗ്രാം/ വാട്സാപ്പ് ലിങ്കുകൾ ക്ലിക്ക് ചെയ്തവർക്ക് പണം നഷ്ടമായതായി റിപ്പോർട്ട്.

അതേസമയം 30 ലക്ഷം വരെ നഷ്ടമായവർ പരാതി പോലും കൊടുക്കാൻ പറ്റാത്ത അവസ്ഥയിലാണെന്നാണ് റിപ്പോർട്ട്. ചിത്രം ഡൗൺലോഡ് ചെയ്യാൻ എന്ന പേരിൽ വാട്സാപ്പ് വഴി പ്രചരിപ്പിക്കപ്പെടുന്ന ലിങ്കിൽ ക്ലിക്ക് ചെയ്തവരാണ് കുടുങ്ങിയത്. മാത്രമല്ല ഇവർക്കാണ് അധികവും പണം നഷ്ടമായിരിക്കുന്നതെന്ന് നോയിഡ എഡിസിപി രൺവിജയ് സിംഗ് പറയുന്നു.

ചിലർ ടെലിഗ്രാം ലിങ്കിൽ ക്ലിക്ക് ചെയ്‌തതോടെ അസഭ്യവർഷം അടങ്ങിയ ഓഡിയോ ഫയൽ ലഭിച്ചു. ചിലരുടെ ബാങ്ക് അക്കൗണ്ട് സ്റ്റേറ്റ്മെന്റ് ഹാക്കർമാർ വീഡിയോ ഫോർമാറ്റിൽ അവർക്ക് തന്നെ അയച്ച് കൊടുത്തു. ഇതോടെ ഇത്തരത്തിൽ ലഭിക്കുന്ന ലിങ്കുകളിൽ ക്ലിക്ക് ചെയ്യുന്നത് അപകടം വിളിച്ച് വരുത്തുമെന്ന് സൈബർ പൊലീസ് മുന്നറിയിപ്പ് നൽകിയിട്ടുണ്ട്. പരിചയമുള്ള ആരെങ്കിലും ഇത്തരത്തിൽ ലിങ്കുകൾ അയച്ചു തന്നാൽ അവരെ കാര്യങ്ങൾ ബോദ്ധ്യപ്പെടുത്തണമെന്നും പൊലീസ് അറിയിക്കുന്നു.