കീർത്തി സുരേഷുമായി ബന്ധപ്പെട്ടുയരുന്ന വിവാഹ വാർത്തകൾ അടിസ്ഥാന രഹിതം ! വിവാഹസമയമാകുമ്പോൾ തങ്ങൾ തന്നെ അറിയിക്കും – പ്രതികരണവുമായി പിതാവും നിർമ്മാതാവുമായ ജി. സുരേഷ്‌കുമാർ

തിരുവനന്തപുരം : പ്രശസ്ത തെന്നിന്ത്യൻ നായികയും നിർമ്മാതാവ് ജി. സുരേഷ്‌കുമാറിന്റെയും അഭിനേത്രി മേനകാ സുരേഷിന്റെയും മകളായ കീർത്തി സുരേഷുമായി ബന്ധപ്പെട്ടുയരുന്ന വിവാഹ വാർത്തകളിൽ പ്രതികരണവുമായി പിതാവ് ജി. സുരേഷ്‌കുമാർ രംഗത്ത് വന്നു. പ്രചരിക്കുന്ന വാർത്തകൾ വ്യാജവും അടിസ്ഥാന രഹിതവുമാണെന്ന് അദ്ദേഹം വ്യക്തമാക്കി.സമൂഹ മാദ്ധ്യമത്തിൽ പങ്കുവച്ച വീഡിയോയിലാണ് അദ്ദേഹം ഇക്കാര്യം വ്യക്തമാക്കിയത്. ഇത്തരം വ്യാജവാർത്തകൾ പ്രചരിപ്പിക്കരുതെന്ന് അദ്ദേഹം അഭ്യർത്ഥിച്ചു.

“എന്റെ മകൾ കീർത്തി സുരേഷിനെക്കുറിച്ച് ഒരു വ്യാജ വാർത്ത ഓൺലൈൻ പ്ലാറ്റ്‌ഫോമിൽ പ്രചരിക്കുന്നുണ്ട്.ഫർഹാൻ എന്ന യുവാവുമായി ഡേറ്റിങ്ങിൽ ആണെന്നുംവിവാഹം കഴിക്കാൻ പോവുകയാണെന്നും കല്യാണം കഴിച്ചെന്നുമൊക്കെയാണ് പ്രചരിക്കുന്ന വാർത്തകൾ. ഇത് തികച്ചും വ്യാജവും അടിസ്ഥാനരഹിതവുമാണ്.

കീർത്തിയുടെ സുഹൃത്താണ് ഫർഹാൻ. ഫർഹാന്റെ പിറന്നാളിന് കീർത്തി പിറന്നാളാശംസകൾ ആശംസിച്ചതുമായി ബന്ധപ്പെട്ട് തമിഴ് ഓൺലൈൻ മാഗസിൻ വാർത്ത കൊടുത്തതും പിന്നീട് വ്യാപകമായി പ്രചരിച്ചതും ഇതിനുശേഷം നിരവധി ആളുകൾ എന്നെ വിളിച്ചു കൊണ്ടിരിക്കുകയാണ്.

മര്യാദയ്ക്ക് ജീവിക്കുന്നവരുടെ മനസ്സമാധാനം ഇല്ലാതാക്കാനുള്ള ശ്രമമാണ് നടന്നുകൊണ്ടിരിക്കുന്നത്. ഇത് തികച്ചും അടിസ്ഥാനരഹിതമായ വാർത്തയാണ്. കീർത്തനയുടെ വിവാഹം നിശ്ചയിക്കുമ്പോൾ ആദ്യം അത് അനൗൺസ് ചെയ്യുന്നത് ഞാനായിരിക്കും സമയമാകുമ്പോൾ സമൂഹ മാദ്ധ്യമങ്ങളിലൂടെയോ അല്ലാതെയോ അറിയിക്കും.

ദയവായി ഇത്തരം വ്യാജവാർത്തകൾ സമൂഹമാധ്യമങ്ങളിലൂടെ പ്രചരിപ്പിക്കരുത്.ഞങ്ങൾ ദുബായിൽ ഒക്കെ പോകുമ്പോൾ ഷോപ്പിങ്ങിന് ഫർഹാനും കൂടെ വരാറുണ്ട്. ഇപ്പോൾ വരുന്ന വ്യാജവാർത്തകളിൽ അവനും വിഷമമുണ്ട്. അവനും ജീവിതമുണ്ട് അവന്റെ ജീവിതത്തിലും പ്രശ്നങ്ങൾ ഉണ്ടാകും. ആദ്യം അവഗണിച്ചെങ്കിലും ഒത്തിരി ആളുകൾ ചോദിക്കുന്നതിനാണ് ഇങ്ങനെയൊരു പോസ്റ്റ് ഇടുന്നത്. ഇപ്പോൾ പ്രതികരിക്കുന്ന വ്യാജവാർത്തകൾ ആരും വിശ്വസിക്കരുത്” അദ്ദേഹം വീഡിയോയിൽ പറഞ്ഞു.