കൂടിക്കാഴ്ച്ച അഞ്ചു മിനിറ്റ് മാത്രം; ആർ എസ്സ് എസ്സ് നേതാവുമായുള്ള കൂടിക്കാഴ്ച്ചയെ പർവ്വതീകരിക്കാനുള്ള ശ്രമം പൊളിയുന്നു; അന്വേഷണ സംഘത്തിന് എ ഡി ജി പി എം ആർ അജിത്കുമാർ നൽകിയ മൊഴി പുറത്ത്

തിരുവനന്തപുരം: ആർ എസ്സ് എസ്സ് സർക്കാര്യവാഹ്‌ ദത്താത്രേയ ഹൊസബാളെയും എ ഡി ജി പി എം ആർ അജിത്കുമാറും തമ്മിൽ നടന്ന കൂടിക്കാഴ്ച്ചയെ പർവ്വതീകരിക്കാനുള്ള ചില കേന്ദ്രങ്ങളുടെ ശ്രമം പൊളിയുന്നു. ഇന്നലെ ആർ എസ്സ് എസ്സ് പ്രചാരക് എ ജയകുമാറിന്റെ ഫേസ്ബുക്ക് പോസ്റ്റ് പുറത്തുവന്നതിന് പിന്നാലെ എ ഡി ജി പി സംസ്ഥാന പോലീസ് മേധാവിക്ക് നൽകിയ മൊഴിയും പുറത്ത്. പി വി അൻവറിന്റെ പരാതിയെ തുടർന്നുള്ള മൊഴിയെടുപ്പിനായി 11 ചോദ്യങ്ങളാണ് തയ്യാറാക്കിയിരുന്നത് ഇതിൽ പതിനൊന്നാമത്തെ വിഷയമായിരുന്നു ആർ എസ്സ് എസ്സ് നേതാക്കളുമായുള്ള കൂടിക്കാഴ്ച്ച. ജാതി മത കക്ഷി രാഷ്ട്രീയ ഭേദമന്യേ നേതാക്കളെ കാണാറുണ്ടെന്നും അത് തൻറെ ഔദ്യോഗിക കൃത്യനിർവ്വഹണത്തെ ഏറെ സഹായിച്ചിട്ടുണ്ടെന്നുമാണ് എ ഡി ജി പി നൽകിയ മൊഴി സർക്കാര്യവാഹ്‌നെയും റാം മാധവിനെയും കണ്ടത് ഇതിന്റെ ഭാഗമായിട്ടാണ്. കൂടിക്കാഴ്ച നീണ്ടത് അഞ്ചു മിനിറ്റ് മാത്രമാണ് പരിചയപ്പെടൽ മാത്രമാണ് നടന്നത്. രണ്ട് കൂടിക്കാഴ്ചയും നടന്നത് തന്റെ തന്നെ താൽപ്പര്യപ്രകാരമാണെന്നുമാണ് എ ഡി ജി പി യുടെ മൊഴി.

തന്റെ സുഹൃത്ത് എ ജയകുമാറുമൊത്താണ് തൃശ്ശൂരിൽ ഹൊസബാളെയെ കാണാൻ പോയത്. റിട്ടയേർഡ് എസ് പി ഉണ്ണി രാജനും ഈ കൂടിക്കാഴ്ചയിൽ ഒപ്പമുണ്ടായിരുന്നു. ഇന്ത്യ ടുഡേ കോൺക്ലേവിൽ പങ്കെടുക്കാൻ എത്തിയപ്പോഴാണ് റാം മാധവിനെ കണ്ടത്. റാവിസ് ഹോട്ടൽ വൈസ് പ്രസിഡന്റ് ആശിഷ് കുമാറുമൊത്താണ് ലീലാ പാലസിൽ റാം മാധവിനെ കണ്ടതെന്നും എ ഡി ജി പി മൊഴി നൽകിയിട്ടുണ്ട്. ഈ കൂടിക്കാഴ്ചകളെയാണ് മുഖ്യമന്ത്രിക്ക് വേണ്ടി ആർ എസ്സ് എസ്സ് നേതാക്കളെ കണ്ടു എന്ന രീതിയിൽ പ്രചരിപ്പിക്കുന്നത്. ഇത് ഗൂഡാലോചനയാണ്. പിന്നിൽ സ്വർണ്ണക്കടത്ത് സംഘങ്ങളും ചില ഉന്നത പോലീസ് ഉദ്യോഗസ്ഥരും ഉണ്ടെന്ന് എ ഡി ജി പി സൂചന നൽകിയിട്ടുണ്ട്. മൊഴി പുറത്തുവന്നതോടെ ആർ എസ്സ് എസ്സ് കൂടിക്കാഴ്ചയിൽ ദുരൂഹതയാരോപിച്ച് പർവ്വതീകരിക്കാനുള്ള ശ്രമം പൊളിയുകയാണ്.