തലസ്ഥാന നഗരിയിൽ യാത്രക്കാരി പീഡനത്തിനിരയായി !ഓട്ടോഡ്രൈവർ മുഹമ്മദ് ജിജാസ് അറസ്റ്റിൽ ! പോക്സോയുള്‍പ്പെടെ ഇരുപതു ക്രിമിനല്‍ കേസുകളിലും ജിജാസ് പ്രതി

തലസ്ഥാന നഗരിയിൽ യാത്രക്കാരിയെ ഓട്ടോഡ്രൈവർ പീഡിപ്പിച്ചു. യാത്രക്കാരിയായ 35 കാരിയെയാണ് ആളൊഴിഞ്ഞ സ്ഥലത്തെത്തിച്ച് ഡ്രൈവര്‍ പീഡിപ്പിച്ചത്. സംഭവത്തിൽ പോക്സോ ഉള്‍പ്പെടെ നിരവധി കേസുകളില്‍ പ്രതിയായ മുട്ടത്തറ സ്വദേശി മുഹമ്മദ് ജിജാസിനെ തിരുവനന്തപുരം ഫോര്‍ട് പൊലീസ് അറസ്റ്റ് ചെയ്തു. അതിജീവിതയുടെ രഹസ്യമൊഴി പോലീസ് രേഖപ്പെടുത്തി.

വെളളിയാഴ്ച രാത്രിയാണ് അതിക്രമമം നടന്നത്. കിഴക്കേകോട്ട അട്ടക്കുളങ്ങരയില്‍ നിന്നാണ് മുട്ടത്തറയിലെ വീട്ടിലേക്ക് പോകാൻ യുവതി ജിജാസിന്‍റെ ഓട്ടോയിൽ കയറുന്നത്. എന്നാല്‍ മുട്ടത്തറയിലേക്ക് പോകുന്നതിനു പകരം ഓട്ടോ വഴിതിരിച്ച് കല്ലുമൂട് ഭാഗത്തേക്ക് പോകുകയായിരുന്നു. ഇത് ചോദ്യം ചെയത സ്ത്രീയെ ഭീക്ഷണിപ്പെടുത്തുകയും ആളൊഴിഞ്ഞ സ്ഥലത്തെത്തിയപ്പോള്‍ പ്രതി പീഡിപ്പിക്കുകയായിരുന്നു. കുതറിമാറിയോടിയ സ്ത്രീ രക്ഷപ്പെട്ടു. ഇതോടെ പ്രതി ഓട്ടോ അതി വേഗത്തില്‍ ഓടിച്ചുപോയി. പരിക്കേറ്റ സ്ത്രീ ജനറല്‍ ആശുപത്രിയിലെത്തി ചികിത്സ തേടിയ ശേഷം ഫോര്‍ട് പോലീസിൽ പരാതി നൽകുകയായിരുന്നു. പോലീസ് സ്ത്രീയെ ആശുപത്രിയിലെത്തിച്ച് പരിശോധനാ വിവരങ്ങള്‍ രേഖപ്പെടുത്തിയ ശേഷം മജിസ്ട്രേറ്റിന്‍റെ മുന്നിലെത്തിച്ച് രഹസ്യമൊഴി രേഖപ്പെടുത്തി.

ഒളിവില്‍ പോയ ജിജാസിനെ ഇന്നു രാവിലെ പിടികൂടി. പോക്സോയുള്‍പ്പെടെ ഇരുപതു ക്രിമിനല്‍ കേസുകളില്‍ പ്രതിയാണ് ജിജാസ്. പീഡനം, തട്ടിക്കൊണ്ടുപോകല്‍ വകുപ്പ് പ്രകാരമുള്ള കേസാണ് പ്രതിയ്ക്കെതിരെ ചുമത്തിയിരിക്കുന്നത്. പ്രതിയെ ഇന്നു തെളിവെടുപ്പിനും കൊണ്ടു പോയി.