പുതുപ്പള്ളിയിൽ ചിത്രം തെളിഞ്ഞു; കോട്ടയം ജില്ലാ പ്രസിഡന്റ് ലിജിൻ ലാൽ ബിജെപി സ്ഥാനാർത്ഥി

മുൻ മുഖ്യമന്ത്രി ഉമ്മൻ ചാണ്ടിയുടെ നിര്യാണത്തെ തുടർന്ന് ഒഴിവ് വന്ന പുതുപ്പള്ളി നിയമസഭാ മണ്ഡലത്തിൽ സെപ്റ്റംബർ അഞ്ചിന് നടക്കുന്ന ഉപതെരഞ്ഞെടുപ്പിനുള്ള ബിജെപി സ്ഥാനാർത്ഥിയെ പ്രഖ്യാപിച്ചു. ബിജെപിയുടെ കോട്ടയം ജില്ലാ പ്രസിഡന്റ ജി.ലിജിൻലാലാണ് പാർട്ടി ടിക്കറ്റിൽ പുതുപ്പള്ളിയിൽ നിന്ന് മത്സരിക്കുന്നത്. കഴിഞ്ഞ നിയമസഭാ തെരഞ്ഞെടുപ്പില്‍ കടുത്തുരുത്തി മണ്ഡലത്തില്‍ നിന്ന് അദ്ദേഹം ജനവിധി തേടിയിരുന്നു. യുവമോർച്ച ജില്ലാ പ്രസിഡന്റ്, ജനറൽ സെക്രട്ടറി എന്നീ നിലകളിൽ പ്രവർത്തിച്ചിട്ടുണ്ട്. കോവിഡ് കാലത്തു ജില്ലയിൽ ബിജെപി നടത്തിയ സന്നദ്ധ പ്രവർത്തനങ്ങളുടെ ചുമതല വഹിച്ചു. കയറ്റുമതി ബിസിനസ് ചെയ്യുകയാണ് ലിജിൻ.

പുതുപ്പള്ളിയിൽ ഉപതിരഞ്ഞെടുപ്പ് പ്രഖ്യാപിച്ചതിനു പിന്നാലെ മണിക്കൂറുകൾക്കുള്ളിൽ യുഡിഎഫ് ചാണ്ടി ഉമ്മനെ സ്ഥാനാർഥിയായി പ്രഖ്യാപിച്ചിരുന്നു.ജെയ്ക് സി.തോമസാണ് എൽഡിഎഫ് സ്ഥാനാർത്ഥിയാകുന്നത്. പുതുപ്പള്ളിയിൽ ജെയ്ക് സി തോമസിന് ഇത് മൂന്നാം അങ്കമാണ്. ബിജെപി കൂടി സ്ഥാനാർത്ഥി പ്രഖ്യാപനം നടത്തിയതോടെ പുതുപ്പള്ളി ഉപതിരഞ്ഞെടുപ്പിനുള്ള മത്സരാർഥികളുടെ പൂർണ ചിത്രം തെളിഞ്ഞു.സെപ്റ്റംബർ എട്ടിനാണ് വോട്ടെണ്ണൽ.