പൈപ്പിന്റെ ലീക്ക് വില്ലനായി!! യുവതിക്ക് കിട്ടിയത് 15 ലക്ഷത്തിന്റെ വാട്ടർബില്ല് !!

വെയ്ൽസ് സ്വദേശിനിയായ ക്ലെയർ ഫിട്സ്പാട്രിക് എന്ന യുവതിക്ക് നിസ്സാരമെന്ന് കരുതുന്ന പൈപ്പിന്റെ ലീക്കിനെത്തുടർന്ന് ലഭിച്ചത് 15 ലക്ഷത്തിന്റെ വാട്ടർ ബില്ല്

കഴിഞ്ഞവർഷം ജനുവരി മാസത്തിലാണ് പുതിയ വീട്ടിലേക്ക് യുവതി താമസത്തിനെത്തുന്നത്. കുറച്ചു നാളുകൾക്ക് ശേഷം യാത്രയ്ക്കായി ഇവർ വീട് വിടുകയും ചെയ്തു. ആരും താമസമില്ലാത്ത തന്റെ വീട്ടിൽ നിന്നുള്ള വാട്ടർ ബില്ലിന്റെ പണം അക്കൗണ്ടിൽ നിന്ന് നഷ്ടമാകുന്നത് ശ്രദ്ധയിൽപ്പെട്ടതോടെയാണ് സംഭവം പുറത്തറിയുന്നത്. ഉടൻതന്നെ അവർ വാട്ടർ അതോറിറ്റിയുമായി ബന്ധപ്പെട്ടു. പരാതി ഉന്നയിച്ചതോടെ കുടിവെള്ള മോഷണം സംശയിച്ച് പരിശോധനയ്‌ക്കെത്തിയ എൻജിനീയർ വീട്ടിൽ വാട്ടർ ലീക്കേജ് ഉണ്ടെന്ന് തിരിച്ചറിഞ്ഞത്.

ലീക്കിന്റെ കൃത്യമായ സ്ഥലം കണ്ടെത്തണമെങ്കിൽ വീട്ടിലേക്കുള്ള ഡ്രൈവ് വേ പൊളിക്കേണ്ടി വരുമെന്നും ഉദ്യോഗസ്ഥർ അറിയിച്ചിരുന്നു. എന്നാൽ യാത്ര കഴിഞ്ഞ് ശേഷം ഓഗസ്റ്റ് മാസത്തിൽ തിരികെ വീട്ടിലേക്ക് എത്തിയ യുവതി കണ്ടത് വീടിനു മുന്നിലെ വലിയ കുഴിയാണ്. എന്നാൽ കുഴിച്ചുനോക്കിയിട്ടും ലീക്കുള്ളത് എവിടെയാണെന്ന് കണ്ടെത്താൻ വാട്ടർ അതോറിറ്റിക്ക് സാധിച്ചിരുന്നുമില്ല.

കാര്യങ്ങൾ ഇങ്ങനെ കയ്യാല പുറത്തെ തേങ്ങ പോലെ തുടരുന്നതിനിടെയാണ് ആറുമാസത്തെ വാട്ടർ ചാർജായി 16000 പൗണ്ടിന്റെ (15. 81 ലക്ഷം രൂപ) ബില്ല് യുവതിക്ക് ലഭിക്കുന്നത്.

ലീക്കുണ്ടായിരിക്കുന്നത് എവിടെയാണെന്ന് അതോറിറ്റിയിലെ ഉദ്യോഗസ്ഥർക്ക് കണ്ടെത്താനായില്ലെങ്കിൽ ചട്ടപ്രകാരം ഒരു സ്വകാര്യ പണിക്കാരെ സ്വന്തം ചെലവിൽ യുവതി ഏർപ്പാടാക്കേണ്ടി വരും. പക്ഷേ ബിൽ തുക പോലും അടയ്ക്കാനുള്ള സ്ഥിതിയില്ലാത്തതിനാൽ കൃത്യമായ പരിഹാരം ഉണ്ടാകുന്നത് വരെ തൽക്കാലം ക്ലെയറിന്റെ ബാങ്ക് അക്കൗണ്ട് മരവിപ്പിച്ചിരിക്കുകയാണ്.

ക്ലെയറിന്റെ വീട്ടിലെ പൈപ്പ് ലൈനിലാണ് തകരാറുള്ളത്. തങ്ങൾ ക്ലെയറിനെ സഹായിക്കാൻ മാത്രമാണ് ശ്രമിച്ചത് എന്നും ലീക്കേജുമൂലമുള്ള പണനഷ്ടത്തിന് ഉത്തരവാദി ഉടമ മാത്രമാണെന്നും അധികൃതർ അറിയിക്കുന്നു. ലീക്കേജിന് ശാശ്വതമായി പരിഹാരം കണ്ടെത്തിയാൽ എന്തെങ്കിലും ഇളവുകൾ നൽകി അത് അക്കൗണ്ടിലേക്ക് എത്തിക്കുമെന്നും വാട്ടർ അതോറിറ്റി വ്യക്തമാക്കി.