സംസ്ഥാനത്തെ പോളിംഗ് ശതമാനം 79.63 ! ഔദ്യോഗിക കണക്കുകൾ പുറത്ത് വിട്ട് തെരഞ്ഞെടുപ്പ് കമ്മീഷൻ ; അന്തിമ കണക്കുകളിൽ നേരിയ മാറ്റം വന്നേക്കാം

തിരുവനന്തപുരം : സംസ്ഥാന നിയമസഭാ തെരഞ്ഞെടുപ്പിലെ പോളിങ് സംബന്ധിച്ച ഔദ്യോഗിക കണക്കുകൾ പുറത്തു വിട്ട് മുഖ്യ തെരഞ്ഞെടുപ്പ് ഓഫീസർ യു. രത്തൻ ഖേൽക്കർ . വോട്ടിങ് യന്ത്രങ്ങളിൽ രേഖപ്പെടുത്തിയ വോട്ടുകൾ മാത്രം പരിശോധിക്കുമ്പോൾ സംസ്ഥാനത്ത് 78.27 ശതമാനം പോളിങ് രേഖപ്പെടുത്തിയതായി അദ്ദേഹം വാർത്താസമ്മേളനത്തിൽ അറിയിച്ചു. ഇതിനൊപ്പം തപാൽ വോട്ടുകൾ കൂടി കണക്കിലെടുക്കുമ്പോൾ ആകെ പോളിങ് 79.63 ശതമാനത്തിലേക്ക് ഉയരുമെന്നാണ് വിലയിരുത്തൽ. മൂന്ന് പതിറ്റാണ്ടിന് ശേഷമുള്ള ഏറ്റവും ഉയർന്ന പോളിങ് നിരക്കാണിത് എന്ന പ്രത്യേകതയും ഇത്തവണത്തെ തിരഞ്ഞെടുപ്പിനുണ്ട്. ഇതിനു മുൻപ് 1980-കളിൽ, കൃത്യമായി പറഞ്ഞാൽ 1987-ലാണ് സംസ്ഥാനത്ത് ഏറ്റവും ഉയർന്ന പോളിങ് (80.54%) രേഖപ്പെടുത്തിയത്.

അന്തിമ കണക്കുകൾ പുറത്തുവിടാൻ വൈകിയെന്ന ആക്ഷേപങ്ങൾ മുഖ്യ തെരഞ്ഞെടുപ്പ് ഓഫീസർ തള്ളി. കൃത്യമായ കണക്കുകൾ ക്രോഡീകരിക്കുന്നതിന് സ്വാഭാവികമായ സമയം ആവശ്യമാണെന്നും വെറും മൂന്ന് ദിവസത്തിനുള്ളിൽ സുതാര്യമായ രീതിയിലാണ് വിവരങ്ങൾ പുറത്തുവിട്ടതെന്നും അദ്ദേഹം വ്യക്തമാക്കി. ഓരോ വോട്ടിന്റെയും കണക്കുകൾ സൂക്ഷ്മമായി പരിശോധിക്കേണ്ടതുണ്ടെന്നും ഇതിൽ യാതൊരുവിധ ആശയക്കുഴപ്പങ്ങൾക്കും സ്ഥാനമില്ലെന്നും അദ്ദേഹം കൂട്ടിച്ചേർത്തു. വോട്ടിങ് നിലയിലെ ഈ വർധനവ് ജനങ്ങളുടെ ജനാധിപത്യ പ്രക്രിയയിലുള്ള വലിയ പങ്കാളിത്തത്തെയാണ് സൂചിപ്പിക്കുന്നത്.

വിവിധ വിഭാഗങ്ങളിലായി നടന്ന വോട്ടിങ്ങിന്റെ വിശദാംശങ്ങളും അദ്ദേഹം പങ്കുവെച്ചു. വീട്ടിലെ വോട്ട് സൗകര്യം ഉപയോഗപ്പെടുത്തിയവരിൽ 96.72 ശതമാനം പേരും വോട്ട് രേഖപ്പെടുത്തി. ആകെ 3,68,193 തപാൽ വോട്ടുകളാണ് ഇതുവരെ കണക്കാക്കിയിട്ടുള്ളത്. ഭിന്നശേഷിക്കാരായ വോട്ടർമാരിൽ 97.71 ശതമാനം പേരും 1,45,604 മുതിർന്ന പൗരന്മാരും ഇത്തവണ സമ്മതിദാനാവകാശം വിനിയോഗിച്ചു എന്നത് ശ്രദ്ധേയമാണ്. അവശ്യ സർവീസ് വിഭാഗത്തിൽപ്പെട്ട 32,172 പേരും വോട്ട് ചെയ്തു. ഇനി വരാനുള്ളത് 53,984 സർവീസ് വോട്ടർമാരുടെ കണക്കുകളാണ്. ഇൻഡക്സ് കാർഡുകൾ വഴി എത്തുന്ന ഈ വോട്ടുകൾ കൂടി ലഭിക്കുന്നതോടെ അന്തിമ പോളിങ് ശതമാനത്തിൽ നേരിയ മാറ്റങ്ങൾ ഉണ്ടായേക്കാം. പൂർണ്ണമായും സുതാര്യമായ പ്രവർത്തനങ്ങളിലൂടെയാണ് തെരഞ്ഞെടുപ്പ് കമ്മീഷൻ മുന്നോട്ട് പോകുന്നതെന്ന് അദ്ദേഹം ഉറപ്പിച്ചു പറഞ്ഞു.