അക്രമപ്രതിഷേധക്കാർക്ക് സർക്കാർ ജോലിയില്ല: കർശന നിയമവുമായി യോഗി സർക്കാർ

അക്രമത്തിലൂടെ ഭരണസംവിധാനം അട്ടിമറിക്കാൻ ശ്രമിക്കുന്നവർക്കും ഗുരുതര കുറ്റകൃത്യങ്ങളിൽ ഏർപ്പെടുന്നവർക്കും സർക്കാർ ജോലി ലഭിക്കുന്നത് തടയാൻ നിർണായക നടപടിയുമായി ഉത്തർപ്രദേശിലെ യോഗി ആദിത്യനാഥ് സർക്കാർ. സർക്കാർ ജോലികളിലേക്കുള്ള നിയമനത്തിൽ ഉദ്യോഗാർഥികളുടെ സ്വഭാവവും മുൻകാല പശ്ചാത്തലവും പരിശോധിക്കുന്നതിനുള്ള ചട്ടങ്ങളാണ് കർശനമാക്കിയത്. കൊലപാതകം, ബലാത്സംഗം, പരീക്ഷാ ചോദ്യപേപ്പർ ചോർച്ച, പരീക്ഷാ തട്ടിപ്പ്, സൈബർ തട്ടിപ്പ് തുടങ്ങിയ ഗുരുതര കുറ്റകൃത്യങ്ങളുമായി ബന്ധപ്പെട്ടവർക്ക് നിയമപ്രകാരമുള്ള അയോഗ്യത ബാധകമാകും. അക്രമത്തിലൂടെ നിലവിലെ സാമൂഹിക വ്യവസ്ഥ മാറ്റാൻ ലക്ഷ്യമിടുന്ന സംഘടനകളുടെ പ്രവർത്തനങ്ങളിൽ ഏർപ്പെടുന്നവരെയും പുതിയ നയം ലക്ഷ്യമിടുന്നു.

സംസ്ഥാന സർക്കാർ വകുപ്പുകൾക്ക് പുറമേ കോർപ്പറേഷനുകൾ, കൗൺസിലുകൾ, സ്വയംഭരണ സ്ഥാപനങ്ങൾ, പഞ്ചായത്തുകൾ, തദ്ദേശസ്ഥാപനങ്ങൾ എന്നിവിടങ്ങളിലെ നേരിട്ടുള്ള നിയമനങ്ങൾക്കും പുതിയ ചട്ടങ്ങൾ ബാധകമാകും. ഉദ്യോഗാർഥികൾ കഴിഞ്ഞ അഞ്ചുവർഷത്തിനിടെ ഒരു വർഷത്തിലധികം താമസിച്ച ജില്ലകളിലും സ്വന്തം ജില്ലയിലും പശ്ചാത്തല പരിശോധന നടത്തും. പൊലീസ് വെരിഫിക്കേഷൻ പൂർത്തിയാകുന്നതുവരെ നിയമനം അനിശ്ചിതമായി നീളാതിരിക്കാൻ യോഗ്യരായ ഉദ്യോഗാർഥികൾക്ക് താൽക്കാലിക നിയമന ഉത്തരവ് നൽകാനും വ്യവസ്ഥയുണ്ട്. എന്നാൽ സുരക്ഷാപ്രാധാന്യമുള്ള തസ്തികകളിൽ വിശദമായ പരിശോധന നിർബന്ധമായിരിക്കും. ക്രിമിനൽ കേസുകളുമായി ബന്ധപ്പെട്ട വിവരങ്ങൾ മറച്ചുവെക്കുകയോ തെറ്റായ വിവരങ്ങൾ നൽകുകയോ ചെയ്താൽ നിയമന നടപടി റദ്ദാക്കാനും കഴിയും.

അതേസമയം, രാഷ്ട്രീയ ആശയത്തിന്റെ പേരിൽ മാത്രം ഒരാളെ സർക്കാർ ജോലിയിൽനിന്ന് അയോഗ്യനാക്കാനാവില്ലെന്ന് ഉത്തർപ്രദേശ് സർക്കാർ വ്യക്തമാക്കിയിട്ടുണ്ട്. എഫ്‌ഐആർ രജിസ്റ്റർ ചെയ്തതോ അന്വേഷണം നിലനിൽക്കുന്നതോ മാത്രം അയോഗ്യതയ്ക്ക് കാരണമാകില്ല. പൊലീസ് റിപ്പോർട്ട് പ്രതികൂലമായാൽ ഉദ്യോഗാർഥിക്ക് സ്വന്തം ഭാഗം വിശദീകരിക്കാനുള്ള അവസരവും നൽകണം. പുതിയ നയത്തെ സമാജ്‌വാദി പാർട്ടിയും കോൺഗ്രസും വിമർശിച്ചിട്ടുണ്ട്. പ്രതിഷേധിക്കാനുള്ള ഭരണഘടനാപരമായ അവകാശത്തെ സർക്കാർ നിയന്ത്രിക്കുകയാണെന്നാണ് പ്രതിപക്ഷത്തിന്റെ വാദം. എന്നാൽ അക്രമവും ഗുരുതര കുറ്റകൃത്യങ്ങളും തടയുന്നതിനൊപ്പം സർക്കാർ നിയമനങ്ങളിൽ സുതാര്യത ഉറപ്പാക്കുകയാണ് പുതിയ ചട്ടങ്ങളുടെ ലക്ഷ്യമെന്നാണ് സർക്കാരിന്റെ നിലപാട്. ജനാധിപത്യത്തിൽ പ്രതിഷേധിക്കാനും അഭിപ്രായ വ്യത്യാസങ്ങൾ പ്രകടിപ്പിക്കാനുമുള്ള സ്വാതന്ത്ര്യത്തെ സമൂഹത്തിൽ അരാജകത്വം ഉണ്ടാകാൻ വേണ്ടി ദുരുപയോഗം ചെയ്യുന്ന ശകതികൾക്ക് അതിശക്തമായ മുന്നറിയിപ്പ് നൽകുന്ന ആദ്യ സംസ്ഥാനമായി മാറുകയാണ് ഉത്തർപ്രദേശ്..