റഷ്യൻ സേനയിലേക്ക് റിക്രൂട്ട്മെന്റ്: തട്ടിപ്പിനിരയായത് 200 ഇന്ത്യക്കാരെന്ന് വിദേശകാര്യ മന്ത്രാലയം; രണ്ടുപേർ കൂടി കൊല്ലപ്പെട്ടു; ഇന്ത്യയിലെ റഷ്യൻ സ്ഥാനപതിയെ ആശങ്ക അറിയിച്ചു

ദില്ലി: വൻതുക പ്രതിഫലം വാഗ്‌ദാനം ചെയ്‌ത്‌ റിക്രൂട്ട്മെന്റ് തട്ടിപ്പിലൂടെ ഇന്ത്യക്കാരെ റഷ്യൻ സൈന്യത്തിലെത്തിച്ച കേസിൽ കൂടുതൽ വിവരങ്ങൾ പുറത്തുവിട്ട് വിദേശകാര്യ മന്ത്രാലയം. മലയാളികളടക്കം തട്ടിപ്പിനിരയായത് 200 പേരെന്ന് മന്ത്രാലയം വ്യക്തമാക്കി. ഇതിൽ പത്തുപേരെ തിരികെയെത്തിച്ചു. രണ്ടുപേർകൂടി കൊല്ലപ്പെട്ടു എന്നാണ് സൂചന. ആകെ കൊല്ലപ്പെട്ടവരുടെ എണ്ണം ആറായി. ഇന്ത്യയിൽ നിന്ന് റിക്രൂട്ട്മെന്റ് തട്ടിപ്പിലൂടെ യുവാക്കളെ റഷ്യയിൽ എത്തിച്ച സംഘങ്ങൾക്കെതിരെ കേന്ദ്രസർക്കാർ നടപടി സ്വീകരിച്ചിരുന്നു. തട്ടിപ്പിനിരയായവരെ നാട്ടിലെത്തിക്കാനായി റഷ്യൻ അധികൃതരുമായി ചർച്ച നടത്തുകയാണ്.

വിവിധ ജോലികളും വൻ പ്രതിഫലവും വാഗ്‌ദാനം ചെയ്‌ത്‌ സമൂഹ മാദ്ധ്യമങ്ങളിലൂടെ പരസ്യങ്ങൾ നൽകിയാണ് തൊഴിലന്വേഷകരെ ഏജൻസികൾ വഞ്ചിച്ചത്. റഷ്യയിലെത്തിച്ച ഇവരെ യാത്രാ രേഖകൾ വാങ്ങിയശേഷം യുക്രൈനുമായുള്ള സംഘർഷം നടക്കുന്ന പ്രദേശങ്ങളിലെത്തിക്കും. ചെറിയ രീതിയിൽ ആയുധ പരിശീലനം നൽകിയശേഷം യുദ്ധമുഖത്ത് അണിനിരത്തുകയാണ് ചെയ്യുന്നത്. ഇന്ത്യക്ക് പുറമെ പാകിസ്ഥാൻ, ബംഗ്ലാദേശ് തുടങ്ങിയ രാജ്യങ്ങളിൽ നിന്നും റിക്രൂട്ട്മെന്റുകൾ നടത്തിയിട്ടുണ്ട്.

വിഷയത്തിൽ റഷ്യൻ അധികൃതരെ ഇന്ത്യ ശക്തമായ പ്രതിഷേധം അറിയിച്ചിട്ടുണ്ട്. ഇന്ത്യയിലെ റഷ്യൻ സ്ഥാനപതിയെയാണ് ആശങ്ക അറിയിച്ചത്. മോഹന വാഗ്ദാനം നൽകിയുള്ള പരസ്യങ്ങൾ അവഗണിക്കണമെന്നും സംസ്ഥാന സർക്കാരുകൾ ഇത്തരം ഏജൻസികൾക്കെതിരേ ജാഗ്രത പാലിക്കണമെന്നും വിദേശകാര്യ മന്ത്രാലയം മുന്നറിയിപ്പ് നൽകിയിട്ടുണ്ട്. കേരളത്തിൽ നിന്നടക്കം കേസിൽ പ്രതികളെ സിബിഐ അറസ്റ്റ് ചെയ്തിട്ടുണ്ട്.