ശബരിമല ‘പുണ്യം പൂങ്കാവനം’ പദ്ധതി പുനരാരംഭിക്കുന്നു;എഡിജിപി പി. വിജയന് ക്ലീൻ ചിറ്റ്;മണ്ഡല-മകരവിളക്ക് തീർത്ഥാടന കാലയളവിൽ പദ്ധതി സജീവമാകും.

തിരുവനന്തപുരം: ശബരിമലയിലെ പ്രശസ്തമായ ‘പുണ്യം പൂങ്കാവനം’ ശുചിത്വ പരിപാലന പദ്ധതി പുനരാരംഭിക്കാൻ സംസ്ഥാന സർക്കാർ ഉത്തരവിറക്കി. പദ്ധതിയുമായി ബന്ധപ്പെട്ട് ഉയർന്ന സാമ്പത്തിക ക്രമക്കേട് ആരോപണങ്ങളിൽ എഡിജിപി പി. വിജയന് സർക്കാർ പൂർണ്ണ ക്ലീൻ ചിറ്റ് നൽകി.പദ്ധതിയുടെ മറവിൽ സാമ്പത്തിക തട്ടിപ്പുകളോ അനാസ്ഥയോ നടന്നിട്ടില്ലെന്ന ആഭ്യന്തര സെക്രട്ടറിയുടെ അന്വേഷണ റിപ്പോർട്ട് അംഗീകരിച്ചാണ് ആഭ്യന്തര വകുപ്പിന്റെ നടപടി. ഇതോടെ വരാനിരിക്കുന്ന മണ്ഡല-മകരവിളക്ക് തീർത്ഥാടന കാലയളവിൽ പദ്ധതി വീണ്ടും സജീവമാകും.

ശബരിമല ഹൈക്കോടതി സ്പെഷ്യൽ കമ്മീഷണർ പി.ജെ. മജുംദാർ സമർപ്പിച്ച സമഗ്ര റിപ്പോർട്ട് പരിഗണിച്ചാണ് സർക്കാർ നിർണ്ണായക തീരുമാനമെടുത്തത്. സന്നിധാനത്തെ മാലിന്യ സംസ്കരണത്തിലും ഭക്തർക്ക് മികച്ച സേവനങ്ങൾ നൽകുന്നതിലും പദ്ധതി വഹിച്ച പങ്ക് റിപ്പോർട്ടിൽ ചൂണ്ടിക്കാണിച്ചിരുന്നു .
നേരത്തെ അന്നത്തെ ക്രമസമാധാന ചുമതലയുള്ള എഡിജിപി എം.ആർ. അജിത് കുമാർ സമർപ്പിച്ച അന്വേഷണ റിപ്പോർട്ടിന്റെ അടിസ്ഥാനത്തിലാണ് പി. വിജയനെതിരെ ആരോപണങ്ങൾ ഉയർന്നതും പദ്ധതി താൽക്കാലികമായി നിർത്തിവെച്ചതും. എന്നാൽ, ഉന്നത ഉദ്യോഗസ്ഥർക്കിടയിലെ അഭിപ്രായവ്യത്യാസങ്ങളുടെ ഭാഗമായാണ് അജിത് കുമാറിന്റെ റിപ്പോർട്ട് തയ്യാറാക്കപ്പെട്ടതെന്ന വിലയിരുത്തലിൽ ആഭ്യന്തര സെക്രട്ടറി ആ റിപ്പോർട്ട് തള്ളുകയും പി. വിജയന് പൂർണ്ണ പിന്തുണ നൽകുകയുമായിരുന്നു.

2011-ൽ തിരുവിതാംകൂർ ദേവസ്വം ബോർഡിന്റെയും തന്ത്രി കുടുംബത്തിന്റെയും പിന്തുണയോടെ പി. വിജയൻ ഐ.പി.എസ് ആവിഷ്കരിച്ച ആശയമാണ് ‘പുണ്യം പൂങ്കാവനം’. കേവലം ഭരണപരമായ പദ്ധതി എന്നതിനപ്പുറം പോലീസ്, അഗ്നിശമന സേന, വിശുദ്ധി സേനാംഗങ്ങൾ, സന്നദ്ധ പ്രവർത്തകർ, ഭക്തജനങ്ങൾ എന്നിവർ ഒന്നടങ്കം പങ്കാളികളാകുന്ന വലിയൊരു ജനകീയ കൂട്ടായ്മയായി ഇത് മാറിയിരുന്നു.പുതിയ ഉത്തരവ് പ്രകാരം കൂടുതൽ സുതാര്യവും സുഘടിതവുമായിട്ടായിരിക്കും ഇനി പദ്ധതി മുന്നോട്ട് പോകുക. ഹൈക്കോടതി സ്പെഷ്യൽ കമ്മീഷണർ ഓഫീസിന്റെയും ഉന്നത പോലീസ് ഉദ്യോഗസ്ഥരുടെയും നേരിട്ടുള്ള മേൽനോട്ടത്തിൽ പമ്പ, സന്നിധാനം, നിലക്കൽ, എരുമേലി എന്നിവിടങ്ങളിൽ വിപുലമായ ഒരുക്കങ്ങളോടെ പുണ്യം പൂങ്കാവനം വീണ്ടും നടപ്പിലാക്കും.