ചരിത്രത്തിലാദ്യമായി ആഷസ് പോരാട്ടം ഇന്ത്യയിലേക്ക്?വൻ തന്ത്രവുമായി ക്രിക്കറ്റ് ഓസ്‌ട്രേലിയ

ലണ്ടൻ: ക്രിക്കറ്റ് ലോകത്ത് വൻ അമ്പരപ്പുണർത്തിക്കൊണ്ട് അവിശ്വസനീയമായ ഒരു നീക്കത്തിന് അടിത്തറയിടുകയാണ് ക്രിക്കറ്റ് ഓസ്‌ട്രേലിയ. ക്രിക്കറ്റ് ചരിത്രത്തിലെ തന്നെ ഏറ്റവും പഴക്കമേറിയതും പ്രൗഢവുമായാ ആഷസ് ടെസ്റ്റ് പരമ്പരയിലെ ഒരു മത്സരം ഇന്ത്യയിൽ വെച്ച് സംഘടിപ്പിക്കുന്നതിനെക്കുറിച്ച് ഓസീസ് ക്രിക്കറ്റ് ബോർഡ് ഗൗരവമായി ആലോചിക്കുന്നതായി റിപ്പോർട്ടുകൾ. ആഷസ് പരമ്പരയുടെ ചരിത്രപ്രസിദ്ധമായ 150-ാം വാർഷിക ടെസ്റ്റ് മത്സരമാണ് ഇന്ത്യൻ മണ്ണിൽ നടത്താൻ ഓസീസ് ബോർഡ് താല്പര്യം പ്രകടിപ്പിച്ചിരിക്കുന്നത്.

ഇന്ത്യയിലെ അതിവിശാലമായ ക്രിക്കറ്റ് വിപണിയും കാണികളുടെ വൻ സാന്നിധ്യവും പൂർണ്ണമായും തങ്ങൾക്ക് അനുകൂലമാക്കുക എന്നതാണ് ഈ തന്ത്രപരമായ നീക്കത്തിന് പിന്നിൽ. ആഗോളതലത്തിൽ ഓസ്‌ട്രേലിയൻ ക്രിക്കറ്റിന്റെ ജനപ്രീതിയും സാമ്പത്തിക നേട്ടവും ഇരട്ടിയാക്കാൻ ഈ തീരുമാനം സഹായിക്കും. ആഷസ് മത്സരങ്ങൾക്ക് മുന്നോടിയായി, ക്രിക്കറ്റ് ഓസ്‌ട്രേലിയയും ബി.സി.സി.ഐ.യും (BCCI) തമ്മിലുള്ള കരാർ പ്രകാരം ഓസ്‌ട്രേലിയയുടെ ജനപ്രിയ ട്വന്റി20 ലീഗായ ബിഗ് ബാഷ് ലീഗിലെ (BBL) ഒരു മത്സരം ഇന്ത്യയിൽ നടത്താൻ ധാരണയായിട്ടുണ്ട്.

ചെന്നൈയിൽ നടക്കുന്ന ബിഗ് ബാഷ് ലീഗ് പോരാട്ടത്തിന് ലഭിക്കുന്ന ജനപങ്കാളിത്തം വിലയിരുത്തിയ ശേഷമായിരിക്കും ആഷസ് ടെസ്റ്റ് ഇന്ത്യയിലേക്ക് എത്തിക്കുന്നതിലെ നിർണായക ചർച്ചകൾ നടക്കുക. ഈ പദ്ധതി യാഥാർത്ഥ്യമായാൽ, അത് അന്താരാഷ്ട്ര ക്രിക്കറ്റിന്റെ ചരിത്രത്തിൽ തന്നെ ഏറ്റവും വലിയ നാഴികക്കല്ലായി മാറും. വരുന്ന ഡിസംബർ 12 നു നടക്കുന്ന മത്സരത്തിൽ ചെന്നൈയിലെ എം. എ. ചിദംബരം സ്റ്റേഡിയം വേദിയാകും .