വാട്ട്സ്ആപ്പ് ഗ്രൂപ്പിൽ രണ്ട് ചേരികളിലായി പടവെട്ടി താരങ്ങൾ! ജഗദീഷിന്റെ നേതൃത്വത്തിൽ സംഘടിച്ച് വിമതരും ; കഴിഞ്ഞ മണിക്കൂറുകളിൽ അമ്മയ്ക്കുള്ളിൽ സംഭവിച്ചത് ഇത്

തിരുവനന്തപുരം : ഹേമ കമ്മിറ്റി റിപ്പോർട്ടും പിന്നാലെ ഉണ്ടായ ലൈംഗികാരോപണങ്ങളിലും മലയാള സിനിമ ഞെട്ടിത്തരിച്ചിരിക്കെ പൊടുന്നനെയുള്ള അമ്മയിലെ കൂട്ടരാജിക്ക് കാരണമായത് സംഘടനയ്ക്കുള്ളിലുണ്ടായ കടുത്ത അഭിപ്രായ ഭിന്നതയെന്ന് റിപ്പോർട്ട്. സംഘടനയുടെ വാട്ട്സ്ആപ്പ് ഗ്രൂപ്പിൽ താരങ്ങൾ രണ്ട് ചേരികളിലായി തർക്കിച്ചതോടെ ഭരണസമിതി പിരിച്ചുവിടാനും സംഘടനയുടെ പ്രസിഡൻ്റ് സ്ഥാനം രാജിവെക്കാനും മോഹൻലാൽ തീരുമാനിക്കുകയായിരുന്നു.

ഇന്ന് നടന്ന ച‍ർച്ചയിൽ നടനും അമ്മ വൈസ് പ്രസിഡൻ്റുമായ ജഗദീഷിനൊപ്പം പൃഥിരാജടക്കം യുവതാരങ്ങളും നടികളും പരസ്യ പ്രതികരണത്തിന് പോകുമെന്ന് നിലപാടെടുത്തതോടെയാണ് നിലവിലെ ഭരണസമിതി പിരിച്ച് വിടാൻ തീരുമാനിച്ചത്. അതേസമയം പുതിയ ഭരണസമിതി വൈകരുതെന്ന് യുവതാരങ്ങൾ ആവശ്യപ്പെട്ടു. രണ്ടുമാസത്തിനുള്ളിൽ ജനറൽ ബോഡി വിളിച്ച് പുതിയ ഭരണസമിതിയെ തെരഞ്ഞെടുക്കാനാണ് ഇപ്പോഴത്തെ തീരുമാനം. അതുവരെ താത്കാലിക ഭരണസമിതി തുടരുമെന്നാണ് വിവരം.