പുണ്യനഗരിയായ അയോദ്ധ്യയുടെ പോരാട്ട ചരിത്രം പ്രമേയമായ “ദി സ്റ്റോറി ഓഫ് അയോദ്ധ്യ” പ്രകാശനം ചെയ്തു; പുസ്തകം ചർച്ചചെയ്യുന്നത് നൂറ്റാണ്ടുകളുടെ ചരിത്രവും, യുദ്ധവും, രാഷ്ട്രീയവും

തിരുവനന്തപുരം: പ്രതികൂല സാഹചര്യങ്ങളോടും പ്രതിലോമ ശക്തികളോടും തലമുറകൾ നീണ്ടുനിന്ന വലിയ പോരാട്ടം നടത്തേണ്ടിവന്ന പുണ്യ നാഗരിയാണ് അയോദ്ധ്യ. ശ്രീരാമൻറെ രാവണവധത്തിനു ശേഷമുള്ള തിരിച്ചു വരവിനു ശേഷമോ വൈദേശിക ആക്രമണകാരിയുടെ സർവ്വതും നശിപിച്ച പടയോട്ടത്തിനു ശേഷമോ, തെണ്ണൂറുകളിൽ തുടങ്ങിയ രാമ ജന്മഭൂമി പോരാട്ടങ്ങൾക്ക് ശേഷമോ അയോദ്ധ്യയുടെ പ്രതിരോധം അവസാനിക്കുന്നില്ല. അയോദ്ധ്യ എന്ന പുണ്യനഗരിയുടെ ചെറുത്തുനിൽപ്പിന്റെ കഥപറയുന്ന ചരിത്ര നോവൽ “ദി സ്റ്റോറി ഓഫ് അയോദ്ധ്യ” യുടെ പ്രകാശനം നടന്നു. യുവ സംവിധായകനും എഴുത്തുകാരനുമായ യദു വിജയകൃഷ്ണനാണ് ഗ്രന്ഥകർത്താവ്. തിരുവനന്തപുരത്ത് അനന്തപുരം ബാങ്ക് ഓഡിറ്റോറിയത്തിൽ ഇന്നലെ നടന്ന ചടങ്ങിൽ ഭാരതീയ ജനതാ പാർട്ടി സംസ്ഥാന വക്താവ് സന്ദീപ് വാചസ്പതി പുസ്തകം പ്രകാശനം ചെയ്തു. ജന്മഭൂമി എഡിറ്റർ ശ്രീകുമാർ ആദ്യ പ്രതി ഏറ്റുവാങ്ങി. ബിജെപി മുൻ സംസ്ഥാനാദ്ധ്യക്ഷൻ കെ രാമൻപിള്ള രാഷ്ട്രീയ നിരീക്ഷകൻ രഞ്ജിത്ത് ജി കാഞ്ഞിരത്തിൽ തുടങ്ങിയവർ പങ്കെടുത്തു.

ചരിത്ര സംഭവങ്ങളുടെ പശ്ചാത്തലത്തിൽ ചരിത്ര കഥാപാത്രങ്ങളടങ്ങുന്ന ഒരു ഇംഗ്ലീഷ് നോവലാണ് ”ദി സ്റ്റോറി ഓഫ് അയോദ്ധ്യ”. തിന്മയുടെ പ്രതീകമായ രാവണനുമായുള്ള രാമന്റെ യുദ്ധം, മധ്യകാലഘട്ടത്തിലെ ബാബറിന്റെയും കൂട്ടാളികളുടെയും ആക്രമണത്തിനെതിരെയുള്ള അയോദ്ധ്യയുടെ ചെറുത്ത് നിൽപ്പ്, തൊണ്ണൂറുകളിലെ രാമജന്മഭൂമിക്കുവേണ്ടിയുള്ള ഐതിഹാസിക പോരാട്ടം എന്നിങ്ങനെ മൂന്നു ഘട്ടങ്ങളിലായാണ് ചരിത്ര നോവലിന്റെ ഘടന. പല നൂറ്റാണ്ടുകളിലുള്ള കഥാപാത്രങ്ങളും, അതിലെ രാഷ്ട്രീയം, യുദ്ധം, ചരിത്രം, കലാപം തുടങ്ങി എല്ലാം ചേർത്ത് ഒരുക്കിയ ഒരു കഥയാണ് ”ദി സ്റ്റോറി ഓഫ് അയോദ്ധ്യ”. അതേസമയം കഥയിലെ കഥാപാത്രങ്ങളിൽ ഒരാളായി ആർക്കിയോളജിസ്റ്റ് പത്മശ്രീ കെ കെ മുഹമ്മദ് ഇതിൽ കഥാപാത്രമായി എത്തുന്നുണ്ട്. അയോദ്ധ്യയിൽ ഖനനം നടത്തി ക്ഷേത്രം ഉണ്ടെന്ന് തെളിയിച്ച ആർക്കിയോളജി ടീമിലെ അംഗം കൂടിയാണ് കെ കെ മുഹമ്മദ്. ഗരുഡാ ബുക്‌സാണ് പ്രസാധകർ. ഗരുഡാ ബുക്‌സിന്റെ വെബ്‌സൈറ്റിൽ ഓൺലൈനായി പുസ്തകം ലഭ്യമാണ്.