തിരുവനന്തപുരത്ത് കടലിൽ ചാടിയെന്ന് പോലീസുകാരന്റെ ആത്മഹത്യാ നാടകം;വ്യാജ ആത്മഹത്യാ ശ്രമമറിയാതെ ഹെലികോപ്റ്റർ ഉപയോഗിച്ച് കടലിൽ തിരച്ചിൽ നടത്തിയപൊലീസിന് വലിയ സാമ്പത്തിക നഷ്ട്ടം;പൊലീസുകാരനെ പാലക്കാട് കണ്ടെത്തി

തിരുവനന്തപുരം : ആത്മഹത്യ ചെയ്യാൻ കടലിൽ ചാടിയെന്ന് ആത്മഹത്യാ നാടകം കളിച്ച പൊലീസ് ഉദ്യോഗസ്ഥനെ പാലക്കാടുനിന്നും പാലക്കാട് സൗത്ത് പൊലീസ് കണ്ടെത്തി. നെല്ലിമൂട് സ്വദേശി ഗിരീഷിനെയാണ് കണ്ടെത്തിയത്. വ്യാജ ആത്മഹത്യാ ശ്രമമാണെന്ന് തിരിച്ചറിയാതെ ഹെലികോപ്റ്റർ അടക്കം ഉപയോഗിച്ച് കടലിൽ തിരച്ചിൽ നടത്തിയത് പൊലീസിന് വലിയ സാമ്പത്തിക നഷ്ടമാണ് ഉണ്ടാക്കിയത്

വെള്ളിയാഴ്ച ഉച്ചയോടെ വീട്ടുകാർ ഗിരീഷിന്റെ ഒരു കത്ത് കണ്ടെടുത്തു.കുടുംബ പ്രശ്നങ്ങളും സാമ്പത്തിക പ്രശ്നങ്ങളും ഉണ്ടായിരുന്ന ഗിരീഷ്, പോകുന്നു എന്നായിരുന്നു കത്തിൽ എഴുതിയിരുന്നത് . ഇതോടെ ഭയന്ന വീട്ടുകാർ പൊലീസിൽ പരാതി നൽകി. ഒടുവിൽ ആഴിമല ക്ഷേത്രത്തിനു സമീപം കടൽത്തീരത്ത് ഗിരീഷിന്റെ ബൈക്ക് കണ്ടെത്തി. തീരത്തേക്ക് പോകുന്നതിന്റെ സിസിടിവി ദൃശ്യങ്ങളും ലഭിച്ചു. ഇതോടെ ഗിരീഷ് കടലിൽ ചാടി ആത്മഹത്യയ്ക്കു ശ്രമിച്ചു എന്ന നിഗമനത്തിൽ പൊലീസ് വളരെ പെട്ടെന്ന് എത്തി.

കോസ്റ്റൽ പൊലീസിന്റെ ബോട്ടുകളും തീര സംരക്ഷണ സേനയുടെ ഹെലികോപ്റ്ററുകളും ഉൾപ്പെടെ ഉപയോഗിച്ച് കടലിൽ തിരച്ചിൽ നടത്തി. രാവിലെ മുതൽ കടലിലും പാറക്കെട്ടിന്റെ പല ഭാഗങ്ങളിലും പരിശോധന നടന്നു. കൈലി മുണ്ടുടുത്ത് കടൽ ഭാഗത്തേക്ക് പോയ ഗിരീഷിനെ വെള്ളമുണ്ട് ഉടുത്ത അവസ്ഥയിലാണ് പാലക്കാട് നിന്നും കണ്ടെത്തിയത്. സിസിടിവിയുള്ള ഭാഗത്ത് കൂടി കടൽ തീരത്തേക്ക് പോയ ശേഷം വസ്ത്രം മാറി പാറക്കെട്ടുകളുള്ള മറ്റൊരു വശം വഴി ഇയാൾ കടന്നതായാണ് വിവരം.