മുത്തച്ഛന്റെ സ്വത്ത് ഭാഗംവെച്ചാൽ പേരക്കുട്ടിക്ക് ജന്മാവകാശമില്ല: സുപ്രധാന വിധിയുമായി സുപ്രീംകോടതി

മുത്തച്ഛന്റെ സ്വത്ത് നിയമപരമായ അവകാശികൾക്കിടയിൽ ഭാഗംവെച്ച് നൽകിയശേഷം പിതാവിന് ലഭിച്ച ഓഹരിയിൽ മകന് ജന്മാവകാശം ഉന്നയിക്കാനാവില്ലെന്ന് സുപ്രീംകോടതി. ഹിന്ദു പിന്തുടർച്ചാവകാശ നിയമത്തിലെ എട്ടാം വകുപ്പ് പ്രകാരം പിതാവിന് ലഭിക്കുന്ന സ്വത്ത് അദ്ദേഹത്തിന്റെ വ്യക്തിഗത സ്വത്തായി മാറുമെന്നും അതിൽ മകന് ജന്മനാ അവകാശമുണ്ടാകില്ലെന്നും ജസ്റ്റിസുമാരായ അഗസ്റ്റിൻ ജോർജ് മസീഹ്, സുനിത അഗർവാൾ എന്നിവരടങ്ങിയ ബെഞ്ച് വ്യക്തമാക്കി. മുത്തച്ഛന്റെ സ്വത്തിൽ പകുതി അവകാശം ആവശ്യപ്പെട്ട് മകൻ നൽകിയ അപ്പീൽ തള്ളിക്കൊണ്ടാണ് കോടതി ഉത്തരവ്.

തമിഴ്നാട്ടിലെ ചെന്നൈയിൽ 1,811 ചതുരശ്ര അടി ഭൂമിയുമായി ബന്ധപ്പെട്ട തർക്കത്തിലാണ് സുപ്രീംകോടതിയുടെ നിർണായക നിരീക്ഷണം. മുത്തച്ഛൻ എൻ. രാമകൃഷ്ണന്റെ മരണശേഷം അദ്ദേഹത്തിന്റെ നിയമപരമായ അവകാശികൾക്കിടയിൽ സ്വത്ത് വിഭജിച്ചിരുന്നു. 1994ലെ ഒത്തുതീർപ്പ് ഉത്തരവിലൂടെ മകന് പിതാവിന് ഭൂമിയുടെ ഒരു ഭാഗം ലഭിച്ചു. പിന്നീട് പിതാവ് ഈ ഭൂമി രണ്ട് വിൽപ്പനരേഖകളിലൂടെ മറ്റുള്ളവർക്ക് കൈമാറി. എന്നാൽ മുത്തച്ഛന്റെ സ്വത്തിൽ തനിക്കും ജന്മാവകാശമുണ്ടെന്നും പകുതി വിഹിതം ലഭിക്കണമെന്നും ആവശ്യപ്പെട്ട് മകൻ 1997ൽ കോടതിയെ സമീപിക്കുകയായിരുന്നു.

ഹിന്ദു പിന്തുടർച്ചാവകാശ നിയമത്തിലെ എട്ടാം വകുപ്പ് പ്രകാരം മുത്തച്ഛന്റെ സ്വത്ത് ആദ്യം അദ്ദേഹത്തിന്റെ ഒന്നാം നിര നിയമാവകാശികൾക്കാണ് ലഭിക്കുകയെന്നും പേരക്കുട്ടിക്ക് പിതാവ് ജീവിച്ചിരിക്കെ നേരിട്ട് അവകാശം ഉന്നയിക്കാനാവില്ലെന്നും സുപ്രീംകോടതി നിരീക്ഷിച്ചു. സ്വത്ത് വിഭജിച്ചതോടെ സംയുക്ത കുടുംബസ്വത്ത് എന്ന നില അവസാനിക്കുകയും ഓരോരുത്തർക്കും ലഭിച്ച ഓഹരി അവരുടെ വ്യക്തിഗത സ്വത്തായി മാറുകയും ചെയ്തു. തമിഴ്നാട് ഭേദഗതി നിയമത്തിലെ 29എ വകുപ്പും ഈ കേസിൽ ബാധകമല്ലെന്ന് വ്യക്തമാക്കിയ കോടതി, മദ്രാസ് ഹൈക്കോടതി വിധി ശരിവെച്ച് അപ്പീൽ തള്ളുകയായിരുന്നു.