പുതു ചരിത്രം കുറിച്ച് നരേന്ദ്ര മോദി! സർക്കാർ വനിതാ സംവരണ ബില്ലിന് ഇന്ന് ചേർന്ന കേന്ദ്ര മന്ത്രി സഭാ യോഗത്തിന്റെ അംഗീകാരം !ബിൽ ബുധനാഴ്ച പാർലമെന്റ് പ്രത്യേക സമ്മേളനത്തിൽ അവതരിപ്പിക്കും

ദില്ലി ; രാജ്യം പ്രതീക്ഷയോടെ കാത്തിരുന്ന വനിതാ സംവരണ ബില്ലിന് അംഗീകാരം നൽകി ഇന്ന് ചേർന്ന കേന്ദ്ര മന്ത്രിസഭാ യോഗം. ലോക്സഭയിലും നിയമസഭകളിലും വനിതകൾക്കു മൂന്നിലൊന്ന് അതായത് 33 ശതമാനം സംവരണം ഉറപ്പാക്കുന്നതാണു വനിതാ സംവരണ ബിൽ. 2010 മാർച്ചിൽ രാജ്യസഭ ബിൽ പാസാക്കിയിരുന്നു. ‘ചരിത്രപരമായ തീരുമാനങ്ങൾ’ ഉണ്ടാകുമെന്നു പ്രധാനമന്ത്രി നരേന്ദ്ര മോദി പ്രഖ്യാപിച്ചശേഷം ചേർന്ന മന്ത്രിസഭാ യോഗത്തിലാണു നിർണായക നീക്കം. ബുധനാഴ്ച പ്രത്യേക പാര്‍ലമെന്റ് സമ്മേളനത്തിൽ ബിൽ അവതരിപ്പിക്കുമെന്നാണ് ലഭിക്കുന്ന റിപ്പോർട്ടുകൾ.

മന്ത്രിസഭാ യോഗത്തിനു മുന്‍പ് കേന്ദ്രമന്ത്രിമാരായ പീയുഷ് ഗോയലും പ്രഹ്ളാദ് ജോഷിയും ആഭ്യന്തരമന്ത്രി അമിത് ഷായുമായി കൂടിക്കാഴ്ച നടത്തിയിരുന്നു. ശേഷം ഇരുവരും പ്രധാനമന്ത്രിയുമായും കൂടിക്കാഴ്ച നടത്തി.
പാര്‍ലമെന്റിന്റെ അഞ്ചു ദിവസത്തെ പ്രത്യേക സമ്മേളനം ഇന്ന് ആരംഭിച്ചതിനു പിന്നാലെയാണു പ്രധാനമന്ത്രി നരേന്ദ്ര മോദിയുടെ അദ്ധ്യക്ഷതയിൽ കേന്ദ്രമന്ത്രിസഭാ യോഗം ചേര്‍ന്നത്.അതി നിർണായക തീരുമാനങ്ങൾ ഇന്ന് ചേർന്ന മന്ത്രി സഭായോഗത്തിൽ എടുത്തെന്നാണു റിപ്പോർട്ട്.

അതെ സമയം ഇന്നത്തെ സമ്മേളനം പഴയ പാർലമെന്റ് മന്ദിരത്തിലാണ് കൂടിയത്. പഴയ പാര്‍ലമെന്റ് മന്ദിരത്തിലെ അവസാന ദിനമായിരുന്നു ഇന്നത്തേത്. പുതിയ മന്ദിരത്തില്‍ നാളെ ഉച്ചയ്ക്ക് 1.15ന് ലോക്‌സഭ സമ്മേളിക്കും.