ദീപാലംകൃതമായി വൈറ്റ് ഹൗസ് ! ഓം ജയ് ജഗദീഷ് ഹരേ ഗാനം അവതരിപ്പിച്ച് സൈനിക ബാൻഡ് ; കെങ്കേമമായി അമേരിക്കൻ മണ്ണിലെ ദീപാവലി ആഘോഷം

വാഷിങ്ടൺ ഡി സി : അമേരിക്കൻ പ്രസിഡന്റിന്റെ ഔദ്യോഗിക വസതിയായ വൈറ്റ് ഹൗസിൽ കഴിഞ്ഞ ദിവസം നടന്ന ദീപാവലി ആഘോഷത്തിനിടെ ‘ഓം ജയ് ജഗദീഷ് ഹരേ’ എന്ന ഗാനം അവതരിപ്പിച്ച്
വൈറ്റ് ഹൗസ് സൈനിക ബാൻഡ്. ഇൻ്റർനാഷണൽ മോണിറ്ററി ഫണ്ട് (ഐഎംഎഫ്) ഫസ്റ്റ് ഡെപ്യൂട്ടി മാനേജിംഗ് ഡയറക്ടർ ഗീതാ ഗോപിനാഥ് പങ്കെടുത്ത ചടങ്ങിലാണ് ബാൻഡ് ഗാനം അവതരിപ്പിച്ചത്.

“ദീപാവലിക്ക് വൈറ്റ് ഹൗസ് മിലിട്ടറി ബാൻഡ് ഓം ജയ് ജഗദീഷ് ഹരേ വായിക്കുന്നത് കേൾക്കുന്നത് അതിശയകരമാണ്. ഏവർക്കും ദീപാവലി ആശംസകൾ ” എന്ന തലക്കെട്ടോടെ ഗീതാ ഗോപിനാഥ് പങ്കുവച്ച വീഡിയോ സമൂഹ മാദ്ധ്യമങ്ങളിൽ വൈറലാവുകയാണ്.

അമേരിക്കൻ പ്രസിഡൻ്റ് ജോ ബൈഡന്റെ നേതൃത്വത്തിൽ നടന്ന ആഘോഷത്തിൽ ഡെമോക്രാറ്റിക് പാർട്ടി നേതാക്കളും ഉദ്യോഗസ്ഥരും കോർപ്പറേറ്റ് എക്സിക്യൂട്ടീവുകളും ഉൾപ്പെടെ 600-ലധികം ഇന്ത്യൻ വംശജരാണ് പങ്കെടുത്തത്.പ്രസിഡൻ്റ് എന്ന നിലയിൽ, വൈറ്റ് ഹൗസിൽ നടന്ന എക്കാലത്തെയും വലിയ ദീപാവലി ആഘോഷത്തിന് ആതിഥേയത്വം വഹിക്കാനുള്ള അവസരം ലഭിച്ചത് ഒരു വലിയ കാര്യമാണെന്ന് ബൈഡൻ പറഞ്ഞു.

തിന്മയ്‌ക്കെതിരായ നന്മയുടെ വിജയത്തെ പ്രതീകപ്പെടുത്തുന്ന ദീപാവലി, രാവണനെതിരായ വിജയത്തിനുശേഷം ശ്രീരാമൻ അയോധ്യയിലേക്കുള്ള മടങ്ങിവരവിനെ അനുസ്മരിക്കുന്നു. ശ്രീരാമൻ അയോധ്യയിലേക്കുള്ള വരവ് അടയാളപ്പെടുത്താൻ ഉത്തരേന്ത്യ ദീപാവലി ആഘോഷിക്കുന്നു. എന്നിരുന്നാലും, തമിഴ്‌നാട്ടിലും കർണാടകയിലും, ദേവി സത്യഭാമയും ഭഗവാൻ കൃഷ്ണനും നരകാസുരനെ വധിച്ച ദിവസത്തിൻ്റെ അടയാളമായി ദീപാവലി ആഘോഷിക്കുന്നു.