സോണിയയിൽ നിന്നുണ്ടായത് അന്തസ്സിനെ മുറിവേൽപ്പിക്കുന്ന വാക്കുകൾ! അംഗീകരിക്കാനാകില്ലെന്ന് രാഷ്ട്രപതിഭവൻ !! പ്രസ്താവന പുറത്തിറക്കി

രാഷ്‌ട്രപതി ദ്രൗപദി മുർമുവിനെതിരെ കോൺ​ഗ്രസ് നേതാവ് സോണിയ ഗാന്ധി നടത്തിയ അധിക്ഷേപ പരാമർശത്തിൽ കടുത്ത അതൃപ്തി പ്രകടിപ്പിച്ച് രാഷ്ട്രപതിഭവന്‍. രാഷ്ട്രപതി ഭവന്റെ അന്തസ്സിനെ മുറിവേല്‍പ്പിക്കുന്ന വാക്കുകളാണ് സോണിയയിൽ നിന്നുണ്ടായതെന്ന് രാഷ്ട്രപതിഭവന്‍ പുറത്തിറക്കിയ പ്രസ്താവനയില്‍ പറഞ്ഞു.

“നയപ്രഖ്യാപന പ്രസംഗം വായിച്ച് രാഷ്ട്രപതി ക്ഷീണിതയായിട്ടില്ല. വാസ്തവത്തില്‍ സമൂഹത്തിലെ പാര്‍ശ്വവത്കരിക്കപ്പെട്ടവരേക്കുറിച്ചും കര്‍ഷകരേക്കുറിച്ചും സ്ത്രീകളേക്കുറിച്ചും സംസാരിക്കുമ്പോള്‍ ഒരിക്കലും ക്ഷീണിതയാകില്ല. സോണിയ ഗാന്ധിയുടെ പരാമര്‍ശം അഗീകരിക്കാനാകില്ല. പ്രസ്താവന നിര്‍ഭാഗ്യകരവും ഒഴിവാക്കേണ്ടതുമായിരുന്നു.”- രാഷ്ട്രപതിഭവന്‍ പറയുന്നു.

ബജറ്റ് സമ്മേളനത്തിലെ രാഷ്ട്രപതി ദ്രൗപദി മുർമുവിന്റെ അഭിസംബോധനയേക്കുറിച്ച് സോണിയ ഗാന്ധി നടത്തിയ പ്രതികരണമാണ് വിവാദമായിരിക്കുന്നത്. രാഷ്ട്രപതിയുടെ പ്രസംഗത്തേക്കുറിച്ച് മാദ്ധ്യമപ്രവര്‍ത്തകര്‍ ചോദിച്ചപ്പോൾ അഭിസംബോധനയില്‍ നിറയെ വ്യാജ വാഗ്ദാനങ്ങളാണെന്നും വായിച്ച് കഴിഞ്ഞപ്പോഴേക്കും പാവം തളര്‍ന്നുപോയെന്നായിരുന്നു സോണിയയുടെ മറുപടി. രാഷ്ട്രപതിയുടെ പദവിയെ ബഹുമാനിക്കാത്ത തരത്തിലാണ് സോണിയയുടെ പരാമര്‍ശം എന്നാണ് ഉയരുന്ന ആരോപണം.രാജ്യത്തെ ദരിദ്രർക്കും വനവാസികൾക്കുമെതിരായ കോൺ​ഗ്രസിന്റെ വരേണ്യസ്വഭാവമാണ് സോണിയയിലൂടെ പ്രകടമായതെന്നും സോണിയ മാപ്പ് പറയണമെന്നും ബിജെപി ദേശീയ അദ്ധ്യക്ഷനും കേന്ദ്രമന്ത്രിയുമായ ജെപി നദ്ദ ആവശ്യപ്പെട്ടു.