ഖജനാവിൽ പണമില്ല ! നവകേരള സദസിൽ പോസ്റ്ററടിക്കാൻ മാത്രം ചെലവഴിച്ചത് 9.16 കോടി രൂപ ; ജനത്തിൻ്റെ കഴുത്തിന് പിടിച്ച് സർക്കാർ

തിരുവനന്തപുരം : തൊടുന്നതെല്ലാം അബദ്ധം മാത്രമാകുന്ന സംസ്ഥാന സർക്കാർ കൊട്ടിഘോഷിച്ച് നടത്തിയ നവകേരള സദസിനെതിരായ വിവാദങ്ങളൊഴിയുന്നില്ല. 36 ദിവസം നീണ്ടുനിന്ന നവകേരള സദസിന്റെ പോസ്റ്ററും ക്ഷണക്കത്തും അച്ചടിക്കാനായി സംസ്ഥാന സർക്കാർ ചെലവിട്ടത് 9.16 കോടി രൂപയെന്ന് റിപ്പോർട്ട്. സർക്കാർ അച്ചടി സ്ഥാപനമായ സി ആപ്റ്റാണ് പോസ്റ്ററും ക്ഷണക്കത്തും അച്ചടിച്ചിറക്കിയത്.

കഴിഞ്ഞ മെയ് മാസത്തിൽ ഇതിന്റെ ചെലവുകൾക്കായി 1.68 കോടി രൂപ സർക്കാർ അനുവദിച്ചിരുന്നു. ഇതിന് പിന്നാലെയാണ് 7.47 കോടി രൂപ കൂടി സർക്കാർ വീണ്ടും അനുവദിച്ചിരിക്കുന്നത്. അതേസമയം, ലോക്സഭ തെരഞ്ഞെടുപ്പ് ലക്ഷ്യമിട്ടായിരുന്നു കേരളം കടുത്ത സാമ്പത്തിക പ്രതിസന്ധിയിലൂടെ നീങ്ങുമ്പോഴും കോടികൾ ചെലവിട്ടുകൊണ്ട് സംസ്ഥാന സർക്കാർ നവകേരള സദസ് നടത്തിയത്. എന്നാൽ തുടക്കം മുതൽ ഒടുക്കം വരെ വിവാദങ്ങളൊഴിയാതെയാണ് നവകേരള സ​ദസ് നടന്നത്. മുഖ്യമന്ത്രിക്കും മന്ത്രിമാർക്കും സഞ്ചരിക്കാനായി ഒന്നരക്കോടി ചെലവിട്ട് പുതിയ ബസ് വാങ്ങിയതും വിവാദങ്ങൾക്ക് വഴിവച്ചിരുന്നു.